دوای 11 ساڵ حکومەتی عێراق یاسایەک بۆ کەرکووک کارا دەکات

ئاڤا نیوز

دوای 11 ساڵ لە هەموارکردنەوەی یاسای پارێزگاکان کە دەسەڵاتێکی فراوانی حکومەتی فیدڕاڵی بۆ پارێزگاکان گواستووەتەوە، ئەمڕۆ حکومەتی عێراق بڕیاریدا گواستنەوەی ئەو دەسەڵاتانە بەگوێرەی یاساکە بۆ پارێزگای کەرکووکیش کارا بکرێت.

چیرۆکی سەرەکی: بەگوێرەی ماددەی 45 لە یاسای پارێزگاکان ژمارە 21ی ساڵی 2008 کە ساڵی 2013 هەموار کراوەتەوە و کەرکووکی لێ بەدەرکراوە، دەسەڵاتی زۆرینەی کارووباری هەشت وەزارەتی خزمەتگوزاری بۆ پارێزگاکان گوازراوەتەوە و لە پڕۆژەکانی وەبەرهێنانیش دەسەڵاتی حکومەتی پارێزگاکان زیاتر کراوە.

ڕاگەیێنراوی فەرمی: نوسینگەی سەرۆکوەزیرانی عێراق بڵاویکردەوە، محەممەد شیاع سوودانی  سەرۆکایەتی یەکەمین کۆبوونەوەی دەستەی باڵای هەماهەنگی نێوان پارێزگاکانی بۆ ساڵی 2025 کرد، لە کۆبوونەوەکەشدا ڕەشنووسی (پرۆژە یاسای نوێی پارێزگاکان) پەسەندکرا و بۆ دەنگدان لەسەری، ڕەوانەی پەرلەمان دەکرێت.

بەگوێرەی ڕاگەیێنراوەکە و پەیوەست بە یاسای پارێزگاکان ژمارە 21ی ساڵی 2008ی هەموار کراویش، کۆبوونەوەکە بڕیاریداوە یاساکە بۆ پارێزگای کەرکووکیش کارابکرێت، کە پێشتر پێکهێنانی ئەنجوومەن و حکومەتێکی هەڵبژێردراو بۆ کەرکووک کرابوو بە مەرج بۆ جێبەجێکردنی یاساکە لەو پارێزگایە.

لە کۆبوونەوەکەدا جەختیش لە هەماهەنگی نێوان پارێزگار و ئەنجوومەنی پارێزگاکان کراوەتەوە، پەیوەست بە ژینگە و سیاسەتی کشتوکاڵیش چەند بڕیارێک دەرکراون، پەیوەست بە جێبەجێنەکردنی پڕۆژەکانی وەبەرهێنان و ئاستەنگییەکانی بەردەمیشی، لیژنەیەک پێکهێنراوە و بڕیارە لە ماوەی (30) ڕۆژدا کارەکانی تەواو بکات.

لەلایەکی دیکەوە: ڕێبوار تەها، پارێزگاری کەرکووک سووپاسی سەرۆکوەزیرانی عێراقی کرد بۆ گواستنەوەی دەسەڵاتی وەزارەتەکان بۆ کەرکووک و ڕایگەیاند، ئەو هەنگاوە "خزمەت بە هەموو کەرکووک دەکات و قۆناغێکی نوێ دێنێتە ئاراوە کە بەشدار دەبێت لە گەشەپێدانی پارێزگاکە و خزمەتکردنی هاوڵاتیانی و جێبەجێکردنی هەڵمەتی ئاوەدانکردنەوە و پێشخستنی پێگە و داهاتووی پارێزگاکە.