وەزارەتی دەرەوەی عێراق: ئامادەکارییەکان بۆ لوتکەی عەرەبی بەردەوامن

ئاڤا نیوز

وەزارەتی دەرەوەی عێراق دەڵێت، لوتکەی عەرەبی پێگەی عێراق و ڕۆڵی کارای لە گۆڕەپانی نێودەوڵەتیدا بەهێزتر دەکات، جەختیش دەکاتەوە کە ئامادەکارییەکان بۆ لوتکەکە بەردەوامن.

وێنە گەورەکە: لوتکەی وڵاتانی عەرەبی کۆبوونەوەی 22 وڵاتی زۆرینە عەرەبی زمانە و ساڵانە لەسەر ئاستی سەرۆککۆمار و پادشای وڵاتان بەڕێوەدەچێت، تێیدا دیارترین ئەو ئاستەنگیی و دەرفەتە هاوبەشانەی ڕووبەڕووی ئەو وڵاتانە دەبێتەوە تاوتوێ دەکرێن.

ڕاگەیێنراوی فەرمی: وەزارەتی دەرەوەی عێراق بڵاویکردەوە، بەسەرپەرشتی فوئاد حوسێن، جێگری سەرۆکوەزیران و وەزیری دەرەوە کۆبوونەوەی خولی ئەنجوومەنی وەزارەتی دەرەوە بەڕێوەچووە و تێیدا چۆنیەتی باشترکردنی توانای فەرمانبەران و ئاسانکاریکردنی ڕێکارەکان تاوتوێ کراوە، هاوکات پێداچوونەوەش بە سیستمی کارکردنی وەزارەت بۆ گەرەنتی گەشەپێدانی ڕۆڵی دامەزراوەیی کراوە بەجۆرێک لەگەڵ گۆڕانکاریی و ئاستەنگییەکانی ئێستا بگونجێت.

هەر بەگوێرەی ڕاگەیێنراوەکە ئامادەکارییەکان بۆ کۆبوونەوەی لوتکەی عەرەبی لە بەغدا کە بڕیارە ئەمساڵ ئەنجام بدرێت گفتوگۆی لەسەر کراوە، کۆی ئەوانەشی گفتوگۆیان لەسەرکراوە بە ئامانجی زیاتر بەهێزکردنی پێگەی عێراق و ڕۆڵی کارایەتی لە گۆڕەپانی نێودەوڵەتیدا.

ئەمەش بزانە: ئاستەنگییەکانی بەردەم فەرمانگە و نوێنەرایەتییە دیپلۆماسییەکانی وەزارەتی دەرەوە تەوەرێکی دیکەی کۆبوونەوەکە بووە و گفتوگۆ لەسەر چارەسەرە پێویستەکان کراوە، ئەوەش بۆ پتەوکردنی کاری دیپلۆماسی و پشتیوانی لە ڕۆڵی وەزارەت لە هەموو ئاست و بوارەکاندا.