لە هەڵەبجە زیاتر لە دوو هەزار کەس فەرمانی وەرگرتنی زەوییان هەیە و پێیان نەدراوە

ئاڤا نیوز

لە سنووری شارەوانی هەڵەبجە زیاتر لە دوو هەزار سوودمەندنەبوو لە وەرگرتنی زەوی هەن و تیمە هونەرییەکان خەریکی فراوانکردنی سنووری شارەوانین.

لێدوانی فەرمی: ئەندازیار سەلام بیلال، سەرۆکی شارەوانی هەڵەبجە بە ئاڤا میدیای ڕاگەیاند: قۆناغی یەکەمی دابەشکردنی زەویمان تایبەتکرد بە خانەوادەی شەهیدان و کیمیاباران و سەنگەر، هاوکات بە سێ قۆناغ تەواوی زەوییەکانمان بەسەریاندا دابەشکرد.

لەلایەکی دیکەوە: شارەوانی هەڵەبجە وردبینی بۆ ژمارەی ئەو زەوییانە دەکات کە ئامادەن و دابەشنەکراون، تاوەکو بۆ قۆناغەکانی دووەم و سێیەم ئامادە بکرێن، هاوکات تیمە هونەرییەکان خەریکی ئەوەن لە دەرەوەی سنووری شارەوانی زەوی بۆ زیندانیانی سیاسیی، فەرمانبەران، ئەو چین و توێژانە دابین بکات کە زەوییان پێ نەدراوە.

ئەوەی پێویستە بیزانیت: لە سنووری شارەوانی هەڵەبجە دوو هەزار و 325 فەرمان لەبارەی پێدانی زەوی لە 2004 تاوەکو ئێستا جێبەجێ نەکراوە، شارەوانی بە هۆکاری نەبوونی زەویی و هۆکاری دیکە نەیتوانیوە زەوییان پێ بدات.

ئەمەش بزانە: لە شارەوانیی هەڵەبجە هێشتا ناوی نزیکەی هەشت هەزار و 500 کەس ماون و لە وەرگرتنی زەوی سوودمەند نەبوون.