ماڵی کوردستان لە داڤۆس دەکرێتەوە

ئاڤا نیوز

ئەمڕۆ بە بەشداری زیاتر لە 360 سەرکردە و 60 سەرۆکی وڵاتانی جیهان کۆڕبەندی داڤۆس لە سویسرا دەستی پێکرد. هاوکات هەر ئەمڕۆ ماڵی کوردستان لە داڤۆس کرایەوە. 

چیرۆکی سەرەکی: کۆڕبەندی داڤۆس لە ساڵی 1971 لەلایەن ئابووریناسێکی ئەڵمانی کلاوس شوابەوە دامەزراوە، وەک کۆڕبەندی بازرگانی ئەوروپی دەستیپێکرد، کە سەکۆیەک بوو بۆ گفتوگۆ لەنێوان سەرکردە سیاسی و بازرگانی و ئەکادیمییەکان، ئەمساڵ کۆڕبەندەکە لەژێر تەوەری "هاوکاری بۆ سەردەمێکی زیرەک"، بەڕێوەدەچێت و پێشوازی لە سێ هەزار بەشداربوو لە 130 وڵاتی جیهانەوە دەکات، لە نێویاندا هەزار و 600 بەڕێوەبەری جێبەجێکار و کەسایەتیی بازرگانی، پێکەوە، تاوتوێی چارەسەری هەندێک لە ئاستەنگە هەرە دیارەکانی جیهان دەکەن، وەک ململانێکان لە ڕۆژهەڵاتی ناوەڕاست، قەیرانی غەززە و سووریا تا گۆڕانی کەشوهەوا و دوای ئاگرکەوتنەوە وێرانکارەکەی کالیفۆرنیا.

لێدوانی فەرمی: هێمن لهۆنی، بەپرسی ئۆفیسی دەستپێشخەری و پەیوەندییەکانی هەرێمی کوردستان، ڕایگەیاند: ئێوارەی ئەمڕۆ بە ئامادەبوونی سەرۆکوەزیران مەسرور بارزانی جارێکی دیکە دەکرێتەوە ماڵی کوردستان دەکرێتەوە، کۆمەڵێک میوان و شاندی عێراقی بە سەرپەرشتی سەرۆککۆماری عێراق و وەزیری دەرەوەی عێراق و چەندین شاندی دیکە سەردانی ماڵی کوردستان دەکەن و چوار ڕۆژی پڕ لەچالاکی لە ماڵی کوردستان لە داڤۆس بەڕێوەدەچێت.

ئەوەی پێویستە بیزانیت: ماڵی کوردستان لە ژێر سەرپەرشتی سەرۆکوەزیرانی هەرێمی کوردستان، مەسرور بارزانی بۆ یەکەم جار لە کۆڕی ئابووری جیهانی لە داڤۆس 2024 دامەزرا.

بۆچی گرنگە: لە ڕێگەی ماڵی کوردییەوە،

- سەرۆکوەزیران دەیەوێت دەروازەیەک بکاتەوە بۆ نیشاندانی تواناکانی هەرێمی کوردستان لەسەر ئاستی جیهان وەک ناوەندێک بۆ وەبەرهێنان و داهێنان، بۆ پەرەپێدانی دەرفەتەکان بۆ هاوبەشی جیهانی و گەشەی ئابووری.

- لە کۆڕبەندی ئابووریی جیهانیی 2025 لە داڤۆسی سویسرا، ڕۆژانە بۆ بەشداریکردن لە چالاکییەکان پێشوازی لە میوانان دەکات و دەرگا بۆ گفتوگۆی ئامانجدار و بەسوود و ئاڵوگۆڕی بیروڕا بۆ چارەی دەرفەت و ئاستەنگە ناوچەیی و جیهانییەكان كراوە دەبێت.