شێخ دارا وادەی کۆتاییهاتنی ئەم شەپۆلەی بەفر و باران ڕادەگەیێنێت

ئاڤا نیوز

بە پێی پێشبینییەکانی کەشوهەوا، بەفر و بارانبارین تا بەرەبەیان بەردوام دەبێت و کەشوهەوای دوو ڕۆژی داهاتوو لە هەرێمی کوردستان هەتاو دەبێت، بەڵام شەختە و بەستەڵەک دروست دەبێت.

وێنە گەورەکە: ئەمرۆ دووشەممە شەپۆلێکی چڕی بەفر و بارانبارین هەرێمی کوردستانی گرتەوە و پلەکانی گەرماش دابەزین. بە پێی پێشبینیەکان ئەم شەپۆلی بەفر و بارانبارینە تا کاتژمێر چواری بەیانی بەردەوام دەبێت، دواتر ئاسایی دەبێتەوە.

لێدوانی فەرمی: شێخ دارا، شارەزا و پێشکەشکاری کەشوهەوا، لە گەشتی هەواڵەکانی کاتژمێر 07:00 ڕایگەیاند:

- ئەم شەپۆلە پێش بەرەبەیان کۆتایی دێت، بەڵام پلەکانی گەرما دادەبەزێت کە لە ناوچە شاخاوییەکان دەگاتە 16 بۆ 17 پلە ژێر سفر، لەناو شارەکانیشدا نزمترین پلە 2 تا 4 پلە ژێر سفر دەبێت و بەرزترین پلەش 5 تا 11 پلە دەبێت.

- جووڵە و ئاراستەی با لە باکوور و باکووری ڕۆژئاوا بە خێرایی 6 تا 8 کیلۆمەتر دەبێت لە کاتژمێرێکدا.

- شەختە و بەستەڵەک دروست دەبێت، بۆیە پێویستە شوفێران ئاگاداری خۆیان بن و بە وریاییەوە مامەڵە بکەن، تاوەکو تووشی ڕووداوی هاتووچۆ نەبن.

- بە پێی پێشبینییەکانی کەشوهەوا، دوو شەپۆلی دیکەی بارانبارین لە لە 25 تا 27ی ئەم مانگە ڕوو لە هەرێمی کوردستان دەکات.

ئەوەی پێویستە بیزانیت: زۆرترین بەفر لە دەورووبەری حاجی ئۆمەران و چیای گارە و چیای شیرین و چیای پێرس باریوە.

ئەمەش بزانە: نزیکەی 40 تا 70 سانتیمەتر بەفر باریوە، بەو هۆیەوە پلەکانی گەرما بۆ خوار 16ی ژێر سفر دابەزیوە.