عێراق دۆزینەوەی یەکێک لە گەورەترین کێڵگە نەوتەکان ڕادەگەیێنێت

 

ئاڤا نیوز

کۆمپانیای نەوتی ناوەڕاست، دۆزینەوەی گەورەترین یەدەگی نەوتی لە کێڵگەیەکی بەغدا ڕاگەیاند، پێشبینی دەکرێت زیاتر لە دوو ملیار بەرمیل بۆ یەدەگی نەوتی عێراق زیاد بکات.

ڕاگەیێنراوی فەرمی: محەممەد یاسین حەسەن، بەڕێوەبەری گشتیی کۆمپانیای نەوتی ناوەڕاست رایگەیاند:  

- گەورەترین یەدەگی نەوت لە کێڵگەی رۆژهەڵاتی بەغدا دۆزرایەوە، بە هاوکاری کۆمپانیای چینی (EBS )، پێشبینی دەکەین زیاتر لە دوو ملیار بەرمیل بۆ نەوتی عێراق زیاد بکات، بەمەش دەبێتە گەورەترین دۆزینەوەی "نەوت لە ناوەڕاستی عێراقدا".

- بەگوێرەی تاقیکردنەوە سەرەتاییەکان ڕێژەی بەرهەمهێنانی ڕۆژانەی دەگاتە پێنج هەزار بەرمیل نەوتی خاو، ئەم دۆزینەوەیە گرنگییەکی ستراتیژیی هەیە، بەو پێیەی یەدەگی نەوتی عێراق زیاتر دەکات کە ئێستا لە پلەی پێنجەمی جیهاندایە.

لە لایەکی دیکەوە: پەرلەمانی عێراق سەرقاڵی هەموارکردنەوەی یاسای بودجەیە و بەگوێرەی هەموارەکە، بەرمیلێک نەوتی خام بە 70 دۆلار خەمڵێندراوە، بەم پێیەش داهاتی عێراق لەهەر بەرمیلێک نەوت 11 دۆلار و 57 سەنت زیاد دەکات.