دانیشتنی پەرلەمان بۆ دەنگدان لەسەر هەمواری یاسای بودجە دەستیپێکرد

ئاڤا نیوز

پەرلەمانی عێراق بۆ دەنگدان لەبارەی چوار پرۆژەیاسای گرنگ کۆدەبێتەوە، دووانیان پەیوەستن بە خەڵکی کوردستان، یەکێکیان هەموارکردنەوەی بودجەیە کە پەیوەستە بە هەناردەکردنەوەی نەوتی کوردستان، دووەمیان تایبەتە بە گەڕاندنەوەی زەوی جووتیارانی کورد لە کەرکووک و سنووری ماددەی 140.

 

چیرۆکی سەرەکی: کارنامەی دانیشتنی ئەمڕۆی پەرلەمانی عێراق 10 بڕگە لەخۆ دەگرێت، گرنگترینیان دەنگدانە لەسەر هەریەکە لە یاسای هەمواری بودجە، باری کەسێتی، گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە و یاسای لێبووردنی گشتیی.

 

ئەوەی ئێستا ڕوودەدات: دانیشتنی پەرلەمان بە سەرۆکایەتی مەحموود مەشهەدانی، سەرۆکی ئەنجوومەنی نوێنەران دەستی پێکرد و یەکەم بڕگەی دانیشتنەکەش دەنگدان دەبێت بە هەمواری یاسای بودجە.

 

بۆچی گرنگە: بەگوێرەی هەمواری بڕگەی (ج) ماددەی 12 لە یاسای بودجە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت، لەسەر ئەو بنەمایەش هەناردەی نەوتی هەرێمی کوردستان ڕاستەوخۆ دەستپێدەکاتەوە.

 

ئەوەی پێویستە بیزانیت: بڕیارە دەنگ لەسەر حەوت پرۆژەیاسا و خوێندنەوە بۆ چەند پرۆژەیاسایەکی دیکە بکرێت کە  گرنگترینیان ئەمانەن:

 

یەکەم: دەنگدان لەسەر هەمواری یەکەمی یاسای بودجەی گشتی.
دووەم: دەنگدان لەسەر پێشنیازە یاسای باری کەسیێتی ژمارە 188ی ساڵی 1959 
سێیەم: دەنگدان لەسەر پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە.
چوارەم: دەنگدان لەسەر پرۆژە یاسای هەمواری دووەمی یاسای لێبووردنی گشتیی ژمارە 27ی ساڵی 2016