پەرلەمانی عێراق دەنگی لەسەر گەڕانەوەی موڵک و ماڵی داگیرکراو لە کەرکووک دا

ئاڤا نیوز

لە دانیشتنی ئەمڕۆی پەرلەمان دەنگ بە پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە و یاسای باری کەسیێتی و لێبووردنی گشتی دران.

 

بۆچی گرنگە: لە ڕێگەی ئەو پرۆژەیاسایەوە کە تایبەتە بە کەرکووک و سنووری ماددەی 140، زیاتر لە 300 هەزار دۆنم مووڵک و زەوی جووتیارانی کورد و تورکمان کە 50 ساڵ پێش ئێستا لەلایەن ڕژێمی بەعسەوە دراون بە عەرەبی هاوردە، بۆ خاوەنە ڕەسەنەکانیان دەگەڕێتەوە.

 

چیرۆکی سەرەکی: بەگوێرەی کارنامەی دانیشتنی ئەمڕۆی پەرلەمانی عێراق 10 بڕگە لەخۆ دەگرێت، حەوت بڕگەیان دەنگدان و سێ بڕگەی دیکە بۆ خوێندنەوەی چەند پرۆژەیاسایەکی دیکە بوو.

 

چی ڕوویدا: بڕگەی یەکەمی دانیشتنەکە کە تایبەت بوو بە هەمواری یاسای بودجە، بەهۆی پێشنیازێکی نوێنەرایەتیی حکومەت دواخرا و پاشان دەنگدان لەسەر پرۆژە یاساکانی دیکە دەستی پێکرد و دەنگ لەسەر هەرسێ پرۆژە یاسای گەڕاندنەوەی خاوەندارێتیی موڵک و ماڵی داگیرکراو بە فەرمانی ئەنجوومەنی ناسراو بە "قیادەی سەورە"ــی هەڵوەشاوە و یاسای باری کەسیێتی و لێبووردنی گشتی دران.

 

لێدوانی فەرمی: دوای دەنگدان بە پرۆژە یاسای گەڕاندنەوەی خاوەندارێتیی موڵک و ماڵی داگیرکراو، شاخەوان عەبدوڵڵا،  جێگری سەرۆکی ئەنجوومەنی نوێنەرانی عێراق ڕایگەیاند، "سوپاس بۆ خودای گەورە سەرکەوتین، دوای 50 ساڵ لە داگیرکاری و 20 ساڵ لە ڕووخانی ڕژێمی بەعس، پرۆژە یاسای گەڕانەوەی زەوییەکان دەنگی لەسەر درا.