چوار ڕۆژە خۆپیشاندانی دانیشتوانی ناحیەی بنگرد بەردەوامە و داوای چاککردنی ڕێگەکەیان دەکەن

ئاڤا نیوز

 

بۆ ماوەی چوار ڕۆژ دەبێت خۆپیشاندانی دانیشووانی ناحیەی بنگردی سەربە قەزای دووکان بەردەوامە، بەهۆی خۆپیشاندانەکەوە هاتووچۆی هاووڵاتییان لە ناوچەکە بە ئۆتۆمبیلی بچووک پەکی کەوتووە.

 

چیرۆکی سەرەکی: دانیشتووانی ناحیەی بنگرد لە قەزای دووکان چوار ڕۆژە بەردەوامن لە گردبوونەوە بەو هۆیەشەوە ڕێگەی سەرەکیی گەیشتن بە ناحیەکەیان و گوندەکانی دەوروبەری بەڕووی شۆفێران داخراوە، داواکاری سەرەکی ئەم هاونیشتمانیانە چاکردنی ڕێگای سەرەکی دەربەند بۆ بنگرد و زیادکردنی کارەبای نیشتمانیی و باشترکردنی کەرتی تەندروستی و چەند خزمەتوگوزاریەکی دیکەی سەرەتاییە.

 

لێدوانی فەرمی: سیروان سەرحەد، قایمقامی قەزای دووکان لەبارەی خۆپیشاندانەکەوە دەڵێت، داواکاریەکانی ئەم خۆپیشاندەرانە ڕەوایە و بۆ ڕێگەکەشیان ڕەزامەندیی ئەنجومەنی وەزیران هەیە تا نۆژەن بکرێتەوە.

 

ئەوەی پێویستە بیزانیت: سیروان سەرحەد ئاماژە بۆ ئەوەش دەکات کە ڕێگای بنگرد - دەربەندی ڕانیە نزیکەی 30 کلیۆمەترە و نزیکەی 600 ملیۆن دینار بۆ نۆژەنکردنەوەی تەرخانکراوە و جگە لە دانیشتووانی ناحیەی بنگرد ڕێگاکە 54 گوندیشی بەسەرەوەیە.

 

ئەوەی لەبارەیەوە دەگوترێت: ئاوات شەریف، هاونیشتمانییەکە و لەبارەی داخستنی ڕێگەکە دەڵێت، گرتنی ڕێگەی دەروازەی گەیشتن بە ناحیەی بنگرد، کاریگەری لەسەر ژیانی ڕۆژانەی خەڵک لە ناوچەکە لە هەموو بوارەکاندا دروستکردووە.