لە کەلار منداڵێک تووشی نەخۆشییەکی دەگمەن دەبێت کە تەنیا 200 کەس لەسەر زەویی تووشیبوون

ئاڤا نیوز 

 

منداڵی مامۆستایەکی کەلار تووشی نەخۆشیەکی دەگمەن دەبێت و لە هەموو جیهاندا تەنیا 200 کەس بە تووشبووی ئەو نەخۆشییە تۆمارکراون.

 

چیرۆکی سەرەکی: مامۆستایەکی ناسراوی ناحیەی رزگاری ماوەی دوو ساڵە بۆ چارەسەری منداڵەکەی لە ئەمەریکایە و داوای درێژکردنەوەی مۆڵەتی بێ مووچەیی دەکات تاوەکو لەگەڵ منداڵەکەی لە ئەمریکا بمێنێتەوە. 

 

 نەخۆشییەکە چییە؟ نەخۆشیەکە ناوی پرۆتیۆسە، نەخۆشییەکی بۆماوەیی زۆر دەگمەنە کە بە زیاد گەشەکردنی هەندێک بەش لە جەستەدا ئەناسرێتەوە. ئەم حاڵەتە کاریگەری لەسەر ئێسک و شانەکان و ئەندامەکان و پێست دەبێت و دەبێتە هۆی گەشەکردنی بەشەکانی جەستە بە شێوەیەکی ناهاوسەنگ. 

 

لێدوانی فەرمی: ئومێد قادر، مامی ئەو منداڵە نەخۆشە بە ئاڤا میدیای ڕاگەیاند: مامۆستا ئارامی برای لە مانگی 9ی 2024ەوە، مۆڵەتە دوو ساڵییەکەی لە وەزارەتی پەروەردە تەواوە بووە، ماوەی پێنج مانگیشە لە بۆشایی یاسایی دایە و داوا دەکەن مۆڵەتەکەی ساڵیک نوێ بکرێتەوە، چونکە منداڵەکەی دووچاری نەخۆشییەک بووەتە کە لە یەک ملیار کەسدا تووشی یەک کەس دەبێت.

 

زانیاریی زیاتر: ئالان حەمەسەعید، وەزیری پەروەردە بە ئاڤا میدیای گوت: نووسراوی تایبەتمان بۆ زیادکردنی ساڵێکی دیکەی مۆڵەتی بێ مووچەیی بۆ مامۆستاکە ئاراستەی دیوانی ئەنجوومەنی وەزیران کردووە، هاوکات هەموو هەوڵێکی بۆ دەدەین. 

 

لەلایەکی دیکەوە: شوان کەلاری، ئەندانی ئەنجوومەنی نوێنەرانی عێراق بۆ ئاڤا میدیای ڕوونکردەوە، کە پەیوەندیی بە سەرۆکی دیوانی ئەنجوومەنی وەزیرانەوە کردووە و ئەویش بەڵێنی چارەسەکردنی کێشەکەی بۆ داوە.