شارەوانیی سلێمانی بڕیارێك سەبارەت بە دروستكردنی خانوو لەسەر زەویی دابەش دوو دەدات

ئاڤا نیوز

ئەنجوومەنی شارەوانیی سلێمانی كارەكانی پرۆسەی جیاكردنەوە و كوژاندنەوە و دەستلێهەڵگرتن لە زەوییەكان بۆ دابەشكردنی بەسەر فەرمانبەراندا زیاتر دەكات و بڕیارێكیش سەبارەت بە دروستكردنی خانوو لەسەر زەویی دابەش دوو دەدات.

وێنە گەورەكە: ئەمڕۆ چوارشەممە 22-1-2025 ئەنجوومەنی شارەوانیی سلێمانی بە سەرپەرشتیی سەرۆكی ئەنجوومەن و ئامادەبوونی جێگری سەرۆك و زۆرینەی ئەندامانی ئەنجوومەن، دانیشتنی ئاسایی خۆی ئەنجامدا و لە میانەدا چەند بڕیارێكی دا.

ڕاگەیێنراوی فەرمی: ئەنجوومەنی شارەوانیی سلێمانی ڕایگەیاند:

- لە كۆبوونەوەكەدا باس لە چۆنیەتی خێراتركردنی پرۆسەی جیاكردنەوە و كوژاندنەوە و دەستلێهەڵگرتن لە زەوییەكان بۆ دابەشكردنی بەسەر فەرمانبەراندا كرا.

- هاوكات داوا لە فەرمانگە پەیوەندیدارەكان كراوە پەلە بكەن لە وەڵامدانەوەی سەرۆكایەتی ئەنجوومەنی شارەوانی تا بتوانێت رێكکارەكانی جیاكردنەوە و یەكگرتنی ئەو زەوییانەی كە بەسەر فەرمانبەراندا دابەشدەکرێت ئەنجام بدات، لەگەڵ خێراتركردنی میكانیزمی كوژاندنەوە و دەستلێهەڵگرتنی زەوییەكان بەمەبەستی دابەشكردنی بەسەر فەرمانبەرانی سنووری سەرۆكایەتیی شارەوانیی سلێمانیدا.

- ئەنجوومەنی شارەوانیی سلێمانی لە كۆبوونەوەی ئەمڕۆ بڕیاری دا بە ڕێپێدانی دروستكردنی خانوو لەسەر زەوی (دابەش دوو) بەو مەرجانەی كە لە بڕیارەکەدا دیاركراوە.