ئەنجوومەنی وەزاری عێراق بۆ ئاسایشی نیشتیمانی دۆسیەی کەمپی هۆل تاوتوێ دەکات

ئاڤا نیوز

 

ئەنجوومەنی وەزاری عێراق بۆ ئاسایشی نیشتیمانی بە سەرۆکایەتی فەرماندەی گشتیی هێزە چەکدارەکان کۆبووەوە و دۆخی ئاسایشی وڵات و دۆسیەی کەمپی (هۆل)ـی تایبەت بە چەکدار و ژن و منداڵی ئەندامانی داعشی لە ڕۆژئاوای کوردستان تاوتوێ کرد.

 

چیرۆکی سەرەکی: بەگوێرەی هەردوو ئاماری ساڵی ڕابردووی ئیدارەی کەمپی هۆل و وەزارەتی کۆچ و کۆچبەرانی عێراق، لەکۆی 43 هەزار چەکدار و ژن و منداڵی ئەندامانی داعشی لەو کەمپە، 18 هەزارییان عێراقین، بەغداش جەخت لە گەڕانەوەی سەرجەمیان دەکاتەوە.

 

ڕاگەیێنراوی فەرمی: نووسینگەی ڕاگەیاندنی سەرۆکوەزیرانی عێراق بڵاوی کردەوە، محەممەد شیاع سوودانی، سەرۆکوەزیران و فەرماندەی گشتیی هێزە چەکدارەکان سەرپەرشتی کۆبوونەوەی ئەنجوومەنی وەزاری بۆ ئاسایشی نیشتیمانی کردووە، تیایدا دۆخی ئەمنیی وڵات و چەند دۆسیەیەکی دیکە تاوتوێ کراون و بڕیاری پێویستیان لەبارەوە دراوە.

ئەو دۆسییانەی تاوتوێ کراون:

- ڕێکارە ئەمنییەکانی تایبەت بە بەڕێوەچوونی ساڵیادی کوژرانی ئیمام موسای کازم، حه‌وته‌مین ئیمامی شیعه‌كان 

- ئامادەیی هێزە ئەمنییەکان بۆ پاراستنی ئاسایشی سنوورەکان لەگەڵ وڵاتانی دراوسێ

- وەزارەتی ناوخۆ لە ڕێکارەکانی تایبەت بە گرێبەستی پڕچەککردن و دابینکردنی ئامێر و کەرەستەی ئەمنیی و سەربازی بەدەر دەکرێت

- گفتوگۆ لەبارەی تەواوکردنی ڕادەستکردنی دۆسیەی ئەمنیی لە وەزارەتی بەرگرییەوە بۆ وەزارەتی ناوخۆ

- جەخت لە کارکردن بە سیستمی ڤیزای ئەلیکترۆنیی کرایەوە

- دۆخی ئاوارەکان و گەڕانەوەیان بۆ شوێنی خۆیان لەگەڵ دۆسیەی کەمپی هۆل تاوتوێ کراوە