لیژنەی تەکنیکی پارتی و یەکێتی لەسەر دیاریکردنی دەسەڵاتی پۆستە باڵاکان کۆدەبنەوە

ئاڤا نیوز

 

سەرەتای هەفتەی داهاتوو جارێکی دیکە لیژنەی تەکنیکی پارتی و یەکێتی کۆدەبنەوە، ئەمە دەبێتە پێنجەم کۆبوونەوەی شاندی تەکنیکی هەردوولا بۆ پێکهێنانی حکومەت و ڕەشنووسی دەسەڵاتی دامەزراوەکان تەواو دەکەن.

 

وێنە گەورەگە: لەنێوان براوەی یەکەم و دووەمی هەڵبژاردنەکان تاوەکو ئێستا دوو کۆبوونەوەی شاندی دانووستانکاری هەردوولا و چوار کۆبوونەوەی لیژنەی تەکنیکی و کۆبوونەوەیەکی باڵای دووقۆڵی لەنێوان سەرۆکوەزیران مەسرور بارزانی و بافڵ تاڵەبانی سەرۆکی یەکێتی،بەڕێوەچووە، لە کۆبوونەوەکانیشیان نەخشەی پێکهێنانی حکومەتی نوێ و شێوازی حوکمرانی گفتوگۆی چڕی نێوانیان بووە.

 

زانیاریی تایبەت: بڕیارە سەرەتای هەفتەی داهاتوو بە دیاریکراوی لەنێوان ڕۆژانی یەکشەممە یان دووشەممە، جارێکی دیکە و بۆ پێنجەم جار لیژنەی تەکنیکی پارتی و یەکێتی کۆببنەوە، ڕەشنووسی دەسەڵاتەکانی سەرۆکی هەرێم، سەرۆکی حکومەت، جێگرەکانیان، دەسەڵاتی وەزیر و بریکاری وەزارەتەکان دەنووسنەوە و ڕەشنووسێک بۆ کۆبووەنەوەی باڵای نێوانیان لەبارەی دەسەڵاتە ئیداری و داراییەکان ئامادە دەکەن.

 

ئەمەش بزانە: ئەندامانی شاندی تەکنیکی پارتی پێکهاتوون، لە پشتیوان سادق، دڵشاد شەهاب و ئومێد سەباح، ئەندامانی شاندی تەکنیکی یەکێتیش پێکهاتوون لە د.ڕێواز فایەق، ئامانج رەحیم و شاڵاو شێخ سەڵاح، دوای ئەم کۆبوونەوەیەش جارێکی دیکە هەردوو حیزب لەسەر ئاستی باڵا کۆدەبنەوە بۆ بریاردان لەسەر ڕەشنووسە ئامادەکراوەکە و پێکهێنانی حکومەت.