سەرۆک بارزانی و تۆبیاس لیندنەر هەڵسەنگاندن بۆ پێشهاتەکانی ناوچەکە دەکەن

 

ئاڤا نیوز

سەرۆک مەسعود بارزانی لە سەڵاحەددین پێشوازی لە تۆبیاس لیندنەر وەزیری دەوڵەت لە وەزارەتی دەرەوەی ئەڵمانیا و ڕێكخەری تایبەتی وەزارەتی دەرەوەی ئەڵمانیا بۆ كاروباری سووریا و شاندێكی یاوەری كرد، لەدیدارەكەدا هەڵسەنگاندن بۆ بارودۆخی سیاسیی و ئەمنیی و دواپێشهاتەكانی ناوچەكە و سووریا کرا.

وێنە گەورەکە: دوای گۆڕانکارییەکانی ناوچەکە بەگشتیی و کەوتنی ئەسەد لە سووریا بە تایبەتی سەرۆک بارزانی ڕۆڵی ئەرێنی و دەسپێشخەریی بۆ نزیکبوونەوەی لایەنە کوردییەکانی ڕۆژئاوای کوردستان دەستپێکردوو و لەگەڵ مەزڵووم عەبدی، فەرماندەی گشتیی هێزەکانی سووریای دیموکرات و شاندی ئەنەکەسە کۆبووەتەوە.

 

ڕاگەیێنراوی فەرمی: بارەگای بارزانی لەم بارەیەوە ڕاگەیێنراوێکی بڵاویکردەوە و تییدا هاتووە:

- لەدیدارەكەدا هەڵسەنگاندن بۆ بارودۆخی سیاسیی و ئەمنیی و دواپێشهاتەكانی ناوچەكە و سووریا کراوە.

- مەترسییەكانی سەرهەڵدانەوەی تیرۆر و ڕۆڵی لایەنە كوردییەكانی سووریا لە ئاییندەی ئەو وڵاتە و پێویستیی پاراستنی سەقامگیری و پشتبەستن بە شێوازی ئاشتیانە و دیالۆگی نێوان لایەنەكانیش تاوتوێ کرا.

- سەرۆك بارزانی جەختی لەوە كردەوە كە پێویستە لایەنە كوردییەكانی سووریا پێكەوە بڕیار لە چارەنووسی خۆیان بدەن و بە ئاشتی و دیالۆگ گرفتەكان چارە بكەن، هەروەها سیستەمی سیاسیی نوێی سووریا تێگەیشتنی بۆ بارودۆخی گەلی كورد و داواكاری و ماف و تایبەتمەندیی گەلی كورد هەبێت.

- لەو دیدارەدا بیروڕا لەبارەی بارودۆخی سیاسیی هەرێم و پڕۆسەی گفتوگۆی نێوان لایەنە سیاسییەكانی هەرێم و پێكهێنانیكابینەی تازەی حكومەتی هەرێم ئاڵوگۆڕ كرا.