مێتا لەبارەی پەیجەکانی ترەمپ و خێزانەکەی قسە بۆ ئاڤا دەکات

ئاڤا نیوز

 

کۆمپانیای مێتا لەبارەی پرسیارێکی بەکارهێنەرانی فەیسبووک و ئینستاگرام کە ناڕەزایی ئەوەیان دەربڕیبوو هەژمارەکانیان ئۆتۆماتیکی فۆڵۆوی پەیجەکانی دۆناڵد ترەمپ و خێزانەکەیان بەبێ ئاگاداری خۆیان کردووە، قسە بۆ ئاڤا دەکات و دەڵێت، "ئەو بابەتە دوورە لە ڕاستییەوە".

 

وێنە گەورەکە: کێشە یان پرسیارەکە چییە؟ لەگەڵ دەستبەکاربوونی  دۆناڵد ترەمپ، وەک سەرۆکی ئەمریکا ژمارەیەکی زۆر لە بەکارهێنەرانی تۆڕە کۆمەڵایەتییەکانی کۆمپانیای مێتا بە فەیبسووک و ئینیستاگرامەوە باسیان لەوە دەکرد، هەژمارەکانیان بە شێوەیەکی ئۆتۆماتیکی فۆلۆی پەیجە فەرمییەکانی دۆناڵد ترەمپ سەرۆکی ئەمریکا و خانمی یەکەمی ئەمریکای کردووە.

 

لێدوانی فەرمی: ئەندی ستۆن، بەڕێوەبەری پەیوەندییەکانی کۆمپانیای مێتا لەبارەی گرفتەکەوە بە ئاڤای ڕاگەیاند، هیچ کارێک نەکراوە بۆ ئەوەی بەکارهێنەرانی تۆڕە کۆمەڵایەتییەکانی مێتا بەشێوەیەکی ئۆتۆماتیکی فۆڵۆی پەیجە فەرمییەکانی دۆناڵد ترەمپ و مێلانیا ترەمپ، خانمی یەکەمی ئەمریکا بکەن.

 

زانیاریی زیاتر: وەک ئەندی ستۆن دەڵێت، ئەو ئەکاونتانە لەلایەن تیمی تایبەتی کۆشکی سپییەوە بەڕێوەدەبرێن، بۆیە لەگەڵ هاتنە دەسەڵاتی دۆناڵد تڕەمپ، ناوەڕۆک و سیاسەتی ئەو پەیجانە گۆڕدراوە.
 
ئەوەی پێویستە بیزانیت:  ڕوونکردەوەکەی مێتا لە وەڵامی پرسیارەکەی ئاڤا مەبەستی ئەوەیە وێنەی پەیجەکان و پۆستەکانیان گۆڕاوە و ئێستا تیمێکی تر کاری لەسەر دەکەن، بۆیە خەڵک گومانی وا دەکەن ئۆتۆماتیکی پەیجەکانیان فۆلۆو کردووە، بۆ نموونە پەیجی کۆشکی سپی پێشتر وێنەی بایدنی پۆست کردووە، ئێستا ترەمپ.