وەزارەتی ناوخۆی عێراق: دوو سەربازی لیوای یەکی پاسەوانی سنوور شەهید بوون

ئاڤا نیوز

 

وەزارەتی ناوخۆی عێراق ڕایگەیاند، دوو سەربازی لیوای یەکی پاسەوانی سنوور لەکاتی جێبەجێکردنی ئەرکدا لەلایەن چەکدارانی پەکەکەوە شەهید دەکرێن و سەربازێکی دیکەش بریندار دەکەن.

 

چیرۆکی سەرەکی: ئەمڕۆ هەینی 24-1-2025، لە ئەنجامی هێرشکردنە سەر خاڵێكی پاسەوانانی سنوور لە سنووری ئیدارەی زاخۆ، دوو لە پاسەوانەكانی سنوور لەلایەن چەکدارانی پەکەکە شەهیدکران و یەكێكی دیكەش بریندار بووە. 

 

ڕاگەیێنراوی فەرمی: وەزارەتی ناوخۆی عێراق لە بەیاننامەیەکدا ڕایگەیاند: هێزەکانی پاسەوانی سنووری سنوور لەکاتی جێبەجێکردنی ئەرکدا لەسەر سنووری عێراق- تورکیا لە ناحیەی باتیفا سەر بە قەزای زاخۆ لەپارێزگای دهۆک، لەلایەن چەکدارانی ڕێکخراوی پەکەکەی قەدەغە کراو، تەقەیان لێکراوە و لە ئەنجامدا دوو سەربازی لیوای یەک شەهیدبوون و یەکێکیش بریندار بوو.

 

ئەوەی پێویستە بیزانیت: ئەو دوو كەسەی شەهیدبوونە بەناوەکانی، عەلی ڕەمەزان ئیسماعیل کە تەمەنی 40 ساڵە و خەڵكی شارۆچكەی سێمێلە، هەروەها مێهڤان ناجی میر شەرەف، تەمەن 41 ساڵ و خەڵكی شاری دهۆكە.

زانیاریی زیاتر: ئەو كەسەی کە بریندار بووە، ناوی بێوار جەمیل ئیبراهیمە و تەمەن 39 ساڵە، ئێستا ڕەوانەی نەخۆشخانە كراوە و باری تەندروستیشی جێگیرە.