یونامی لەسەر هەمواری یاسای باری کەسیی دێتە دەنگ

ئاڤا نیوز

 

نەتەوەیەکگرتووەکان لە عێراق بەدواداچوون بۆ دوایین پێشهاتەکان سەبارەت بە پەسەندکردنی هەمواری یاسای باری کەسی و یاسا گرنگەکانی دیکە لەلایەن ئەنجوومەنی نوێنەرانی عێراقەوە دەکات و جەخت لەسەر پاراستنی ماف و خۆشگوزەرانی ژنان و منداڵان دەکاتەوە.

 

وێنە گەورەکە: دوای چەندین مشتومڕ و نیگەرانی ڕێکخراوەکانی کۆمەڵی و مەدەنی و بزووتنەوەکانی ژنان و ئەو تێبینییانەی لەسەر هەموارەکە هەبوون، دواجار ڕۆژی 21-1-2025 لە پەرلەمان دەنگ لەسەر هەمواری یاسای باری کەسی درا و پەسند کرا.

 

ئەوەی پێویستە بیزانیت: هەموارەکە ڕێگە بە کچان لە تەمەنی نۆ ساڵی و کوڕ لە تەمەنی 15 ساڵی دەدات لە دەرەوەی دادگاکان هاوسەرگیری بکەن،  هاوسەرگیری کاتی ڕێگەپێدراو دەبێت، لەکاتی جیابوونەوە منداڵ لای باوکی دەبێت و پرۆسەی هاوسەرگیری لە دادگەکان گۆڕانکاریی بەسەردا دێت.

 

ڕاگەیێنراوی فەرمی: لە ڕاگەیێنراوەکەی یونامیدا هاتووە:

- نەتەوەیەکگرتووەکان لە عێراق بەدواداچوون بۆ دوایین پێشهاتەکان سەبارەت بە پەسەندکردنی هەمواری یاسای باری کەسی و یاسا گرنگەکانی دیکە لەلایەن ئەنجوومەنی نوێنەرانی عێراقەوە دەکات.
- لەم ڕووەشەوە نەتەوەیەکگرتووەکان لە عێراق جەخت لەوە دەکاتەوە کە چاکسازی یاسایی لەگەڵ پابەندییە نێودەوڵەتییەکانی عێراق لە بواری مافەکانی مرۆڤدا بگونجێت بەتایبەتی سەبارەت بە پاراستنی ماف و خۆشگوزەرانی ژنان و منداڵان و پارێزگاریکردن لە دەستکەوتە مێژووییەکانی وڵات.
- بە شێوەیەکی بەرفراوان لەگەڵ لایەنە پەیوەندیدارەکانی عێراق لە پەیوەندیداین و جەختمان لەسەر پێویستی گفتوگۆیەکی بوونیادنەر و گشتگیر لەسەر ئەم بابەتە کردووەتەوە.
- بەم ئاراستەیە لەسەر هەوڵەکانمان بەردەوام دەبین، نەتەوەیەکگرتووەکان پشتیوانیی خۆی بۆ عێراق بۆ بەدیهێنانی خواستەکانی بۆ سەروەری یاسا و ڕێزگرتن لە مافەکانی مرۆڤ دووپات دەکاتەوە.