ئەندامێکی داعش لە سلێمانی دەستگیرکرا

ئاڤا نیوز

 

دەزگای دژە تیرۆری عێراق بڵاویکردەوە، لە پارێزگای سلێمانی ئەندامێکی گرووپی تیرۆرستی داعشیان دەستگیرکردووە و لە خوورماتووش چەند مۆڵگە و حەشارگەیەکی چەکدارانی داعش ئاشکراکراون و تێکدران.

 

ڕاگەیێنراوی فەرمی: دەزگای دژە تیرۆری عێراق لە ڕاگەیێنراوێكدا بڵاویکردەوە، "بەهەماهەنگی لەگەڵ دەزگای دژە تیرۆر و بەڕێوەبەرایەتیی ئۆپەراسیۆنەكانی ئاسایشی هەرێمی كوردستان، توانیمان ئەندامێكی داعش لە سلێمانی بدۆزینەوە و دەستگیری بكەین".

 

زانیاریی زیاتر: دەزگای دژە تیرۆری عێراق ئەوەشی باسكردووە، بە هاوكاری دژە تیرۆری سلێمانی، ئۆپەراسیۆنێكیان لە زنجیرە چیای پەلكانە لە شارۆچكەی خوورماتوو ئەنجامداوە و توانیویانە سێ حەشارگە و مۆڵگەی پاشماوەكانی تیرۆرستانی داعش خاپوور بكەن، كە چەندین كەرەستەی ئامادەكراوی تێدا بووە بۆ تەقاندنەوە، هەروەها لە نزیک گوندی زیركەی سەر بە شارۆچكەی خورماتوو، سێ مۆڵگەی دیكەی شانە نووستووەكانی داعش بەئامانج گیراون.

 

باکگراوند: هەرچەندە لە ساڵی 2017ـەوە کۆتاییهاتنی داعش لە عێراق ڕاگەیێنراوە، بەڵام شانە نوستووەکانی ڕێکخراوەکە هێشتا ماون و ناوبەناو هێزە ئەمنییەکان ئۆپەراسیۆن بۆ دەستگیرکردن و ڕێگری لە سەرهەڵدانەوەی ڕێکخراوە ئەنجامدەدەن.