سبەی وەزیری دەرەوەی تورکیا سەردانی عێراق دەکات

ئاڤا نیوز

لیژنەی پەیوەندییەکانی دەرەوەی پەرلەمانی عێراق ئەجێندای هاکان فیدان، وەزیری دەرەوەی تورکیا بۆ عێراق ئاشکرا دەکات.

چیرۆکی سەرەکی: بڕیارە سبەی یەکشەممە، هاکان فیدان سەردانی بەغدا بکات و چەندین پرسی هاوبەش و ناوچەیی لەگەڵ بەرپرسانی عێراق تاوتوێ بکات، فیدان و فوئاد حوسێن کۆنگرەیەکی ڕۆژنامەوانییان دەبێت لە بەغدا.

لێدوانی فەرمی: عامر فایز، ئەندامی لیژنەی دەرەوەی پەرلەمانی عێراق بە ئاڤا میدیای ڕاگەیاند: ڕووبەڕووبوونەوەی پارتی کرێکارانی کوردستان، مەلەفی سووریا، هەماهەنگی بەغدا و ئەنقەرە و دیمەشق دەربارەی پرسی ئاسایش و ئابووریی، پرۆژەی ڕێگەی گەشەپێدان، سەرەکیترین بابەتی کۆبوونەوەکانی هاکان فیدان لەگەڵ بەرپرسانی عێراق دەبێت.

فیدان لەگەڵ هەر یەکە لە فوئاد حوسێن، وەزیری دەرەوەی عێراق، محەممەد شیاع سوودانی، سەرۆکوەزیرانی عێراق و عەبدوللەتیف ڕەشید، سەرۆککۆماری عێراق کۆدەبێتەوە.

زانیاریی زیاتر: پێشتر میدیا جیهانییەکان ئاشکرایان کردبوو کە فیدان لە سەردانەکەی  بۆ بەغدا، تاوتوێی ئەوە دەکات عێراق پارتی کرێکارانی کوردستان بخاتە نێو لیستی تیرۆر و لەنێو خاکی عێراق دووریانبخاتەوە.

باکگراوند: هاکان فیدان لەمانگی 6ـی ساڵی 2023، سەردانی عێراق وهەرێمی کوردستانی کرد، دوای ئەوە لە مانگی 4ـی ساڵی 2024، لەگەڵ ڕەجەب تەیب ئەردۆغان، سەرۆککۆماری تورکیا بەیاوەریی شاندێک بۆ دووەمجار سەردانی عێراق و هەرێمی کوردستانیان کرد و 27 ڕێککەوتن و یاداشتی لێکتێگەیشتنیان لە کەرتە جۆراوجۆرەکاندا واژۆ کرد.