ئێران مامۆستایەكی ئایینی كورد حەوت ساڵ زیندانی دەكات

ئاڤا نیوز

میدیاکانی ڕۆژهەڵاتی کوردستان بڵاویانکردووەتەوە، مەلا حەسەن جەنگخاهـ، مامۆستای سوننیی مەزهەب و کوردی سنووری شاری سەڵماس، سزای حەوت ساڵ زیندانی بەسەردا سەپێنراوە.

چیرۆکی سەرەکی: بە گوێرەی زانیاری ڕێکخراوی مافی مرۆڤی هەنگاو، ڕۆژی پێنجشەممە  29-02-2024، حەسەن جەنگخاهـ، دانیشتووی گوندی "حەوت خان" سەر بە شاری سەلمَاس، دوای بانگکردنى بۆ لقی جێبەجێکردنی سزاکانی دادگای ئەو شارە، دەستبەسەر کرا و بەمەبەستی تێپەڕکردنی سزای حەوت ساڵ بەندکردنەکەی بۆ بەندیخانەی ناوەندیی ئورمیە گواسترایەوە.

بۆچی گرنگە: حەسەن جەنگخاهـ، پێشووتر بە هۆکاری ناڕەزایەتی دەربڕین سەبارەت بە کوژرانی کۆڵبەران و کاسبکارانی کورد و پەیوەندی لەگەڵ حیزبە کوردستانییەکان لە تۆڕە کۆمەڵایەتییەکاندا، لێپرسینەوەی لێکراوە و بۆماوەی یەک هەفتە دەستبەسەرکراوە، لەبەرامبەر 300 ملیۆن تمەن بەشێوەی کاتیی  و تا کۆتایی پڕۆسەی کۆتایی هاتنی دادگاییەکەی ئازادکرا.

ئەمەش بزانە: لەماوەی یەک مانگدا ئێران سزای بەسەر سێ مامۆستای کوردی ڕۆژهەڵاتی کوردستان سەپاندووە.