هاکان فیدان: دوایین چاوەڕوانیمان لە عێراق بە"تیرۆرست ناساندنی پەکەکە"یە

ئاڤا نیوز 

 

هاکان فیدان، وەزیری دەرەوەی تورکیا لە کۆنفرانسی ڕۆژنامەوانی لەگەڵ فوئاد حوسێن، وەزیری دەرەوەی عێراق، داوای لە عێراق کرد پەکەکە بە "گرووپی تیرۆرستی" بیناسێنن، لە پێناو کاری هاوبەش بۆ سەقامگیری خاکی عێراق و ناوچەکە، هەروەها جەختی لە گرنگی پەیوەندی  نێوان ئیدارەی نوێی سووریا و عێراق کردەوە. 

چیرۆکی سەرەکی: پێشنیوەڕۆی ئەمڕۆ هاکان فیدان بەسەردانێکی فەرمی گەیشتە بەغدا، دوای کۆبوونەوەی لەگەڵ فوئاد حوسێن، لە کۆنگرەیەکی ڕۆژنامەوانیدا باسی لە گرنگی پەیوەندییەکانی نێوان هەردوولا کردەوە، بناغەی پەرەدان بە سەقامگیری عێراقی بۆ " کاری هاوبەش و بەرەنگاربوونەوەی پەکەکە" گەڕاندەوە. 

لێدوانی فەرمی: هاکان فیدان گوتی: بەردەوامی بە پەیوەندییە ستراتیژییەکانی نێوان عێراق و تورکیا دەدەین. 

-  قەبارەی بازرگانی نێوان بەغدا و ئەنقەرە 20 ملیار دۆلارە، کاردەکەین بۆ ئەوەی زیاتری بکەین. 

-  سەقامگیری و بەهێزی عێراق، ئاشتی و سەقامگیرییە بۆ ناوچەکە. 

-  پێویستە کاری هاوبەش بکەین بۆ بەرەنگاربوونەوەی پەکەکە. 

- دواین چاوەڕوانیمان لە عێراق، بەفەرمی ناساندنی پەکەکەیە وەک "گرووپێکی تیرۆرستی".  

-  پەیوەندی نێوان عێراق و سووریا گرنگە بۆ سەقامگیری ناوچەکە. 

-  وەک تورکیا ئامادەین بۆ پشتیوانیکردنی پەیوەندییەکانی نێوان سووریا و عێراق. 

- گرنگی بە پەرەدان بە پڕۆژەی ڕێگەی گەشەپێدان دەدەین، کار بۆ ئەوە دەکەین خێراتر کاری لەسەر بکرێت. 

 

لەلایەکی دیکەوە: فوئاد حوسێن، وەزیری دەروەی عێراق، گرنگی کاری هاوبەش و پتەوکردنی پەیوەندییە سیاسی، ئابووری، بازرگانی نێوان هەردوو وڵاتی بە گرنگ و پێویست ناوبرد. 

 

باکگراوند: ئەمە سێیەم سەردانی فەرمی هاکان فیدانە وەک وەزیری دارەوەی تورکیا بۆ عێراق، داوین جار لە 14ی ئاداری 2024 بۆ بەشداریکردن لە کۆبوونەوەی شاندی ئەمنی بەغدا و ئەنقەرە سەردانی بەغدای کرد.