سەرۆككۆماری عێراق: حەشدی شەعبی بەشێکە لە هێزە ئەمنییەکانی عێراق

ئاڤا نیوز 

 

 

سەرۆککۆماری عێراق لە چاوپێکەوتنێکی تەلەڤزیۆنی دووپاتی کردەوە،  گرووپە چەكدارەكان "عێراقین" و  پەیوەستن بە حەشدی شەعبی کە بەشێکە لە هێزە ئەمنییەکانی عێراق.

 

وێنە گەورەکە: دوای دەستبەکاربوونی ئیدارەی ترەمپ پرسی هێرشکردن سەر گرووپە چەکدارەکانی عێراق گەرمتر بووە و لە چەند میدیایەکیش باس لەوە کراوە کە داوای لە عێراق کراوە حەشدی شەعبی و گرووپە چەکدارەکان هەڵبوەشێنێتەوە. 

 

لێدوانی فەرمی: عەبدوللەتیف ڕەشید سەرۆككۆماری عێراق لە میانەی دیدارێكدا لەگەڵ كەناڵی "فرانس 24" لەبارەی هەڵوەشاندنەوەی حەشدی شەعبی ڕایگەیاند:  حەشد بەشێكە لە هێزە ئەمنییەكانی عێراق و پێویست بە وروژاندنی پرسی لەوشێوەیە ناكات، ئەوانە پرسێكی ناوخۆیین و حكومەتی عێراق كۆنتڕۆڵی بارودۆخەكەی كردوووە.

 

ئەوەی پێویستە بیزانیت: پێشتر محەممەد شیاع سوودانی، سەرۆکوەزیرانی عێراق ئاشکرای کرد کە حکومەت لە هەوڵی ئەوەدایە هێزە چەکدارەکان یەکبخاتەوە لە چوارچێوەی یاسای و دامەزراوەی فەرمیی دەوڵەت، بەهەمان شێوە فوئاد حوسێن، وەزیری دەرەوەی عێراق دووپاتی کردەوە کە گفتوگۆ لەنێوان لایەنەکان دا لە ئارادایە دەربارەی کۆکردنەوەی چەک لەدەستی دەوڵەت و چەندین میکانیزم لەمبارەیەوە خراونەتە ڕوو.

 

ئەمەش بزانە: سەرەڕای جەختکردنەوەی بەرپرسانی باڵای حکومەتی عێراق لەسەر هەڵوەشاندنەوەی گرووپە چەکدارەکان، بەڵام گرووپە چەکدارەکان ڕەتی دەکەنەوە چەک دابنێن و بچنە ژێر چەتری وەزارەتی بەرگریی عێراق.