ژمارەی کریستیانەکان لە ڕیزەکانی پۆلیسی خۆجێیی نەینەوا زیاد دەکرێن

 

ئاڤا نیوز

بە بڕیاری سەرۆکوەزیران و فەرماندەی گشتی هێزە چەکدارەکانی عێراق، ژمارە کریستیانەکان لە ڕیزەکانی پۆلیسی خۆجێیی پارێزگای نەینەوا زیاد دەکرێن.

وێنە گەورەکە: کورد و کریستیانەکان دوو پێکهاتەی گرنگ و سەرەکی پارێزگای نەینەوان، بەڵام لە ماوەی ڕابردوودا بە دیاریکراوی لەنێو ڕیزەکانی پۆلیسی خۆجێیی ئەو پارێزگایە ژمارەیان بەراورد بە ڕێژەی دانیشتوان لە پارێزگاکە زۆر کەمتر بووە.

ڕاگەیێنراوی فەرمی: بە گوێرەی ڕاگەیێنراوێک سەباح نوعمان، وتەبێژی فەرماندەی گشتی هێزە چەکدارەکانی عێراق، لەسەر ڕاسپاردەی سەرۆکوەزیران ژمارەی ڕۆڵەکانی پێکهاتەی کریستیان لە نێو ڕیزەکانی پۆلیسی خۆجێیی لە پارێزگای نەینەوا زیاد دەکرێت، ئەمەش دوابەدوای وەرگیرانیان لە کۆلێژ و پەیمانگەکانی پێگەیاندنی پۆلیس لە ماوەی دوو ساڵی ڕابردوودا.

بەشێکی تری ڕاگەیێنراوەکەی فەرماندەی گشتی هێزە چەکدارەکانی عێراق:

- ئەم بڕیارە ڕەنگدانەوەی پەرۆشی حکومەتە بۆ بەهێزکردنی پەیوەندی نێوان ڕۆڵەکانی پێکهاتە ناوخۆییەکان و دامەزراوە ئەمنییەکان.

- پابەندبوونی حکومەت بە ئاوەدانکردنەوەی ناوچە زیانلێکەوتووەکان دووپاتکرایەوە، جەخت لەسەر جێبەجێکردنی ئەو پڕۆژانە کرایەوە کە خزمەت بە خێزانە ئاوارە و گەڕاوەکان دەکەن.

- بەشداریی پێکهاتەی کریستیان لە هێزە ئەمنییەکان نوێنەرایەتی هەنگاوێکی گرنگ دەکات بەرەو پتەوکردنی یەکڕیزی نیشتمانی و ڕێزگرتن لە فرەچەشنی، کە بنەمای بەهێزی عێراق و یەکگرتوویی گەلەکەی و پاراستنی مۆزایکی مرۆیی عێراقی و بەهێزکردنی نوێنەرایەتی دادپەروەرانەیە لە نێوان هەموو پێکهاتەکانی گەلی عێراق لە پاراستنی ئاسایش و پاراستنی ناوچەکانیان.