ئاستی بەرهەمهێنانی نەوتی کەرکووک بەرزدەکرێتەوە

ئاڤا نیوز

 

دوای گەشەپێدانی دوو کێڵگەی نەوتی لە پارێزگای کەرکووک، کۆمپانیای نەوتی باکوور ڕۆژانە چوار هەزار بەرمیل بەرهەمهێنانی نەوت زیاد دەکات و دەڵێت، ئەو نەوتە بۆ پڕکردنەوەی پێداویستی ناوخۆی عێراق و وەبەرهێنانی غاز بەکاردەهێنرێت.

 

وێنە گەورەکە: ئێستا بەرهەمی ڕۆژانەی کێڵگە نەوتییەکانی کەرکووک لە دەورووبەری 300 بۆ 350 هەزار بەرمیلە، زۆرینەی ئەو نەوتەش هەناردەی دەرەوە ناکرێت و بۆ دابینکردنی وزە لە ناوخۆی عێراقدا بەکاردەهێنرێت.

 

لێدوانی فەرمی: عەقیل وەهبی، بەڕێوەبەری دەستەی کێڵگە نەوتییەکانی کەرکووک سەر بە کۆمپانیای نەوتی باکوور بە ڕۆژنامەی سەباحی نیمچە فەرمی ڕاگەیاندووە، زیادکردنی بەرهەمهێنانی نەوت بۆ پڕکردنەوەی پێداویستیی ناوخۆییە لە بەرهەمەکانی نەوت و وەبەرهێنانی غاز، ئەویش دوای گەشەپێدانی بیرە نەوتەکانی ژمارە 76 لە کێڵگەی جمبور و ژمارە 200 لە کێڵگەی نەوتی بای حەسەن کە ئێستا بە بەردەوامی کاریان تێدا دەکرێت.

 

بە وتەی ئەو بەرپرسەی کۆمپانیای نەوتی باکوور، لە هەر کام لەو دوو کێڵگە نەوتییە ڕۆژانە دوو هەزار بەرمیل نەوت زیاد دەکرێت.