عێراق هاوردەکردنی پەلەوەر و بەرهەمەکانی لە هەرێمی کوردستانەوە قەدەغە دەکات

ئاڤا نیوز

وەزارەتی کشتوکاڵی عێراق بڕیاری داوە بە قەدەغەکردنی پەلەوەر و بەرهەمەکانی لە پارێزگاکانی هەرێمی کوردستانەوە بۆ پارێزگاکانی دیکەی عێراق.

ڕاگەیێنراوی فەرمی: وەزارەتی کشتوکاڵی عێراق ڕایگەیاند: قەدەغەکردنی پەلەوەر و بەرهەمەکانی لە هەرێمی کوردستانەوە بۆ پارێزگاکانی دیکەی عێراق بەهۆی بڵاوبوونەوەی پەتایە، تاوەکو دۆخی ڕوون دەبێتەوە، ئەم قەدەغە کردنە بەردەوام دەبێت.

لێدوانی فەرمی: دوو هەفتە لەمەوبەر ئاکۆ محەممەد، نوێنەری خاوەن پڕۆژەکانی بەرهەمهێنانی هێلکە ڕایگەیاند: دوو هەفتە زیاترە لە بازگەکانی حکومەتیی عێراق ئاستەنگ بۆ هەناردەی هێلکەی سلێمانی دروست دەکرێت.

هۆکارە زانراوەکان: ئەو بڕیارەی وەزارەتی کشتوکاڵی عێراق هاوکاتە لەگەڵ ڕاگەیێنراوی هاوبەشی وەزارەتی کشتوکاڵ و سەرچاوەکانی ئاو و وەزارەتی تەندروستی و پارێزگای هەولێر لەبارەی ئەو نەخۆشیانەی کە گوێزراوەن لە ئاژەڵ و پەلەوەرەوە بۆ مرۆڤ.

ئەوەی پێویستە بیزانیت: ئەمڕۆ دووشەممە کۆبوونەوەیەکی هاوبەش لەنێوان وەزیرانی کشتوکاڵ و تەندروستی و نوێنەری نووسینگەی سەرۆکوەزیران و پارێزگاری هەولێر لە دیوانی وەزارەتی کشتوکاڵ کرا بە مەبەستی تاوتوێکردنی ئەو رێکارانەی کە ئەرکی هەر سێ لایەن دیاری دەکات لە ڕووبەروبوونەوەی ئەو نەخۆشییانەی کە لەنێوان ئاژەڵ و پەلەوەر و مرۆڤدا هاوبەشە لەگەڵ چۆنیەتی دانانی ڕێکار و پلانی زانستی بە مەبەستی خۆپاراستن لێیان.