باڵیۆزی بەریتانیا: دەمانەوێت عێراق لە کەرتی وزەدا سەربەخۆ بێت

ئاڤا نیوز

باڵیۆزی بەریتانیا لە عێراق ڕایگەیاند، کۆمپانیاکانی وڵاتەکەی بۆ وەبەرهێنان دەیانەوێت بێنە عێراق و لەندەنیش پشتیوانی هەوڵەکانی بەغدا دەکات بۆ ئەوەی لە کەرتی وزەدا سەربەخۆ بێت.

وێنە گەورەکە: 14ی ئەم مانگە سەرۆکوەزیرانی عێراق و بەریتانیا لە لەندەن کۆبوونەوە و واژۆیان لەسەر 13 گرێبەستی بازرگانی کرد بە بەهای نزیکەی 15 ملیار دۆلار، بڕیاریشیاندا بەغدا و لەندەن لەبوارەکانی کۆچبەران، ژینگە، ئابووری، بەهێزکردنی ڕۆڵی ژنان و دەیان بواری دیکە هاوکاری یەکتریی بکەن.

لێدوانی فەرمی: ستیڤن هیچن، باڵیۆزی بەریتانیا لە عێراق لە میانی بەشداریکردنی لە کۆنگرەی عێراق بۆ وزە، ئاماژەی بە ژینگەی وەبەرهێنان لە عێراق و ئاستەنگییەکانی بەردەمی کرد و وتی، کۆمپانیاکانی بەریتانیا ژینگەی عێراق لەڕوی ئەمنیی و یاساییەوە وەک کێشە دەبینن، ئێستا ژینگەی ئەمنی بەراورد بە ساڵانی 2014 و 2015 باشتر بووە، بەڵام ژینگەی یاسایی بۆ وەبەرهێنان هێشتا ئاستەنگی لەبەردەمە.

بەوتەی باڵیۆزی بەریتانیا لە عێراق، ئارامی سیاسی و ئیداری دوو پایەی دیکەی گرنگی بەهێزکردنی کەرتی وەبەرهێنانن لە وڵاتدا، بۆیەش داوایکرد دوای هەڵبژاردنی پەرلەمانی عێراق، حکومەتی نوێ بە خێرایی پێکبهێنرێت و ساڵێک نەخایەنێت چونکە کاریگەری بەرچاوی لەسەر شکۆی وڵاتەکە و هاندان بۆ وەبەرهێنان دەبێت، جەختیشکردەوە کە لەندەن پشتیوانی عێراق دەکات تا لەبواری وزەدا سەربەخۆ بێت و بگاتە ئاستی خۆبژێوی.