وەزیری کارەبای عێراق: لەبارەی وزە و غاز هەماهەنگیی زۆرمان لەگەڵ هەرێمی کوردستان هەیە

 

ئاڤا نیوز

وەزارەتی کارەبای عێراق، بۆ باشترکردنی دۆخی کارەبا داوای غازی کێڵگەی کۆرمۆر دەکات و دەشڵێت هەماهەنگی لەگەڵ حکومەتی هەرێمی کوردستان دەکەین.

چیرۆکی سەرەکی: ڕۆژی سێشەممە 28ی ئەم مانگە کۆنگرەی عێراق بۆ وزە لە بەغدا دەستیپێکرد و ئەمڕۆ دوو ڕۆژە بەردەوامە، نوێنەرانی حکومەتی هەرێمی کوردستان لە پانێڵە سەرەکییەکانی کۆنگرەکە بەشدارن و پڕکردنەوەی بۆشایی لە پەیوەندییەکانی نێوان هەولێر و بەغدا یەکێک لە تەوەرە سەرەکییەکانی ئەمڕۆیە.

لێدوانە فەرمییەکان:

- زیاد فازڵ، وەزیری کارەبای عێراق لە پانێڵێکی کۆنگرەکەدا ڕایگەیاند: هەماهەنگییەکی زۆر لەگەڵ حکومەتی هەرێمی کوردستان هەیە سەبارەت بە هاوردەکردنی وزە و غاز، هاوینی ڕابردوو خواست لەسەر کارەبا گەیشتە 48 هەزار مێگاوات، لەکاتێکدا بەرهەمهێنان 27 هەزار مێگاوات بوو، لە چەند ڕۆژی داهاتووشدا وەزارەت گرێبەستێک لەگەڵ کۆمپانیای "مەسدەر"ی ئیماراتی دەکات بۆ بەرهەمهێنانی نزیکەی هەزار مێگاوات کارەبای دیکە.

- ئەحمەد ئەلموسەوی، وتەبێژی وەزارەتی کارەبای عێراق بە ئاڤا میدیای ڕایگەیاند: سەرۆکوەزیران وەزارەتی کارەبای ڕاسپاردووە بەکڕینی 100 ملیۆن مەتر سێجا غاز لە کێڵگەی کۆرمۆر، بەڕێککەوتن لەگەڵ کۆمپانیای هیلال کە لەو کێڵگەیە کار دەکات و لەئێستاشدا لە قۆناغی دانوستانداین لەگەڵ کۆمپانیاکە بۆ کڕینی ئەو ڕێژە غازە".

گوتیشی: "وەزارەتی کارەبا پلانی ستراتیژیی هەیە بۆ دروستکردنی چەندین پرۆژەی جۆراوجۆر و نیمچە ڕێککەوتنێك هەیە لەگەڵ کۆمپانیای "سیمنز ئای جی" بۆ دروستکردنی وێستەگەی غازی بە ڕێژەی 35 هەزار مێگاوات".