ئەندامێکی نەوت و وزە: لایەنەکان ڕازی بوون دەنگ لەسەر هەمواری یاسای بودجە بدەن

ئاڤا نیوز

یەکشەممەی داهاتوو تێچووی بەرهەمهێنان و گواستنەوەی نەوتی کوردستان دەبێتەوە پرسی نێو هۆڵی پەرلەمانی عێراق، بەگوتەی ئەندامێکی لیژنەی نەوت و وزە بەشێوەیەکی سەرەتایی لایەنەکان ڕازی بوون دەنگ لەسەر هەمواری یاساکە بدەن.

چیرۆکی سەرەکی: شەوی ڕابردوو سەرۆک و جێگرانی سەرۆکی پەرلەمانی عێراق و سەرۆکی سەرجەم فراکسیۆنەکانی پەرلەمانی عێراق، لە ماڵی سوودانی کۆبونەوە و ئامانجی کۆبوونەوەکە قسەکردن بوو لەسەر هەمواری پرۆژە یاسای بودجە و مووچە.

وێنە گەورەکە: هەفتەی داهاتوو لە بەغدا پڕ جموجۆڵ دەبێت، کێشە هەڵپەسێردراوەکانی نێوان هەرێمی کوردستان و حکومەتی فیدڕاڵی لە کات و شوێنی جیاواز هەڵوەستەیان لەسەر دەکرێت، لە پەرلەمانی عێراق هەوڵ بۆ تێپەڕاندنی هەمواری یاسای بودجە و چارەسەری کێشەی هەناردەی نەوت هەیە.

لێدوانی فەرمی: کاڤین شێخ سەعید، ئەندامی لیژنەی نەوت و وزە بە ئاڤای گوت، "کوتلەکان بەشێوەیەکی سەرەتایی ڕێککەوتوون لەسەر ئەوەی ڕۆژی یەکشەممە دەنگ لەسەر هەمواری پڕۆژە یاسای بودجە بدەن."

ئەوەی پێویستە بیزانیت: بەگوێرەی هەموارەکە کە لە بڕگەی (ج)ـی ماددەی 12 لە یاسای بودجە هاتووە، تێچووی بەرهەمهێنان و گواستنەوەی نەوتی کوردستان لە 6 دۆلارەوە بۆ 16 دۆلار زیاد دەکرێت.