بەتۆمەتی دۆسیەی گەندەڵی سكرتێری سەرۆككۆماری عێراق دەستگیركرا

ئاڤا نیوز

سکرتێری سەرۆککۆماری عێراق، بە تۆمەتی وەرگرتنی بەرتیل لە بەرامبەر ئازادکردنی تۆمەتبارێک، دەستگیر دەکرێت و سەرۆکایەتی کۆماریش ڕەتیدەکاتەوە ئەو کەسە سکرتێری سەرۆککۆمار بێت و دەشڵێت پشتر ئەو کەسەیان لە کارەکەی دوورخستووەتەوە.

وێنەگەورەکە: لە دوای ساڵی 2003 گەندەڵی لە عێراق بووەتە باوترین دیاردە و سەرجەم دامەزراوەکانی دەوڵەتی گرتووەتەوە، ئێستاش گەیشتووەتە ئاستێكی مەترسیدار و حکومەت ناتوانێت بنبڕی بکات.

زانیاریی بەدەستهاتوو: سەرچاوەیەکی ئاگاداری دادوەری ئەوەی بە میدیا عێراقییەکان ڕاگەیاندووە : "تیمێک لە دەستەی دەستپاکی توانیان (چ. س. ع) کە وەک سکرتێری سەرۆککۆمار کاردەکات، بە تاوانی وەرگرتنی بەرتیل لە هاووڵاتییەک لە بەرامبەر بەڵێنێکی درۆ بۆ ئازادکردنی تۆمەتبارێک، دەستگیر بکەن".

بۆچوونی لایەنی بەرامبەر: نووسینگەی ڕاگەیاندنی سەرۆکایەتی کۆماری عێراق لە ڕاگەیێنراوێکدا ڕەتیدەکاتەوە ئەو کەسە یەکێک لە پاسەوانەکان یان سکرتێری سەرۆککۆمار بێت و ئاماژە بۆ ئەوە دەکات "پێشتر سەرۆکایەتی کۆمار لە ڕێککەوتی 2024-11-26 لە ڕاگەیێنراوێکدا ئاماژەی بۆ ئەوە کردبوو کە یەکێک لە پاسەوان و بە سیفەتی هاوەڵی سەرۆککۆمار پۆستەکەی بە مەبەستی کەسیی بەکارهێنابوو و خۆی وەکو سکرتێری سەرۆککۆمار ناسادبوو"

زانیاریی زیاتر: هەر بەگوێرەی ڕاگەیێنراوەکە: ئەوکات لەسەر ئەو کارانەی سەرۆککۆماری بڕیاریدا بە دەستپێلەکارهەڵگرتنی ئەو کەسە لە کارەکەی و ئەنجامدانی دەستبەجێ لێکۆێنەوە لەگەڵی و گرتنەبەری ڕێکاری یاسایی بەرامبەری.