سوننەکان داوایەکی بەپەلە ئاڕاستەی لەتیف ڕەشید دەکەن

ئاڤا نیوز

سوننەکانی عێراق کە دوو ساڵ زیاتر بوو داواکارییەکانیان لە دەرچوواندنی یاسای لێبووردنی گشتی چڕکردبووەوە، ئێستا چاوەڕێی ڕێکارەکان ناکەن و بەدەستی خۆیان یاساکەیان بۆ لەتیف ڕەشید، سەرۆککۆماری عێراق بردووە، داوای لێدەکەن بەپەلە یاساکە واژۆ بکات.

بۆچی گرنگە: سوننەکان دەڵێن لە عێراق زیاتر لە 22 هەزار کەس بەتۆمەتی تیرۆر زیندانیکراون، زۆرێک لەوانەش تۆمەتەکانیان لەسەر ساغنەبووەتەوە و تەنیا لەسەر بنەمای هەواڵدەری نهێنی سزادراون، بۆیە ئومێدیان هەیە یاسای لێبووردنی گشتی کە پەرلەمانی عێراق 21ـی ئەم مانگە پەسەندی کرد، ببێتە هۆکارێک و لەکۆتاییدا زۆرێک لەوانە ئازاد بکرێن.

بینراو و بیستراو: عەبدولکەریم عەبتان، جێگری سەرۆکی لیژنەی یاسایی لە پەرلەمانی عێراق دوێنێ خۆی نوسراوی ئاڕاستەکردنی یاسای لێبوردنی گشتی لە سەرۆکایەتیی پەرلەمانەوە بۆ سەرۆکایەتی کۆمار بردووە و ڕادەستی کامل دلێمی سەرۆکی دیوانی سەرۆکایەتی کۆماری عێراقی کردووە.

زانیاری زیاتر: بەگوێرەی ڤیدیۆکە کە ئەو پەرلەمانتارە لە پەیجی تایبەتی خۆی لە فەیسبووک بڵاویکردووەتەوە، بە سەرۆکی دیوانی سەرۆکایەتیی کۆمار دەڵێت، یاسای لێبووردنی گشتیی یاسایەکی گرنگە و هەموو ڕێکارەکانی لە پەرلەمان تەواوکردووە، ئێستاش دایکی زیندانکراوەکان و کەسوکاریان و هەمووو ئەوانەی بەر یاساکە دەکەون، چاوەڕێن سەرۆککۆمار لە چارەکی یەکەمی ئەو 15 ڕۆژەی یاسا بۆ واژۆکردنی یاساکان بۆی دیاریکردووە، یاساکە واژۆ بکات واتە داوا دەکەن لە ماوەی چوار ڕۆژی داهاتوودا سەرۆککۆمار یاساکە واژۆ بکات.

لەلایەکی دیکەوە: لە ڕۆژی پەسەندکردنی یاساکەدا، محەممەد عەبدڕەبە جبووری، ئەندامی فراکسیۆنی سەدارەی سوننەکان لە پەرلەمانی عێراق بە ئاڤا میدیای ڕاگەیاندبوو، هەمواری دووەمی یاسای لێبوردنی گشتیی داواکارییەکانی ئەوانی تێدا جێگە کراوەتەوە و ئەوان وەک سوننەکان لە یاساکە ڕازیین.