دوای 45 ساڵ "بکوژانی" محەممەد باقر سەدر دەستگیر دەکرێن

ئاڤا نیوز

سەرۆکوەزیرانی عێراق دەستگیرکردنی بەشێک لە تۆمەتبارانی لەسێدارەدانی محەممەد باقر سەدر، یەکێک لە مەرجەعە باڵاکانی شیعە و خوشکەکەی ڕاگەیاند.

چیرۆکی سەرەکی: لە ڕۆژی 1980-2-9 حکومەتی ڕژێمی بەعس، هەر یەکە لە محەممەد باقر سەدر، مەرجەعی باڵای شیعەکان و بینت ئەلهودا، خوشکەکەی لەسێدارەدا.

لێدوانی فەرمی: محەممەد شیاع سوودانی، سەرۆکوەزیرانی عێراق لە تۆڕی "ئێکس" ڕایگەیاند: هێزە ئەمنییەکان توانیان بکوژانی محەممەد باقر سەدر و خوشکەکەی هاوکات ئەنجامدەرانی بکوژانی چەند ئەندامێکی بنەماڵەی حەکیم دەستگیر بکەن.

ڕاگەیێنراوی فەرمی: سەباح نوعمان، وتەبێژی محەممەد شیاع سوودانی، فەرماندەی گشتیی هێزە چەکدارەکان دووپاتی دەکاتەوە کە ئەو تاونبارانە پێشتر دەستگیرکراون و لە ڕاگەیێنراوێکدا ڕایگەیاند: ڕاگەیاندنی وردەکاریی ئۆپەراسیۆنی دەستگیرکردنی تاوانباران دوای ئەوە دێت، هەموو ڕێکارە یاساییەکان لە دادگە بەرامبەریان تەواوکران بەپێی یاسا و دەستوور.

لە لایەکی دیکەوە: بەگوێرەی دەزگای ئاسایشی نیشتیمانی پێنج تۆمەتبار دەستگیر کراون کە ئەمانەن:

- سەعدوون سەبری جەمیل ئەلقەیسی، بەڕێوەبەری شوعبەی پێنجەمی ڕژێمی پێشووی بەعس بووە و  پلەی لیوای هەبووە، دانی ناوە بەوەی محەممەد باقر سەدری بە چەکی خۆی لەسێدارەداوە و دانی بە ئەنجامدانی چەندین کۆمەڵکوژی دیکە ناوە لەوانەش، کوشتنی دوو گەنجی بنەماڵەی حەکیم، یەکێک لە مەرجەعە باڵاکانی شیعە لەعێراق.

- خەیروڵڵا حەممادی، بەرپرسی ئەمنی ڕژێمی پێشوو بە پلەی لیوا بووە، بەشداریی لە سەرکوتکردن و دوورخستنەوەی کوردانی فەیلی کردووە.

- هەیسەم عەبدولعەزیز فایق، بەشداریی لە کوشتنی سەدر و خوشکەکەی کردووە.

- شاکر تەها یەحیا، بەرپرسی ئەمنی بووە بە پلەی لیوا و دیارترین تاوانەکانی، چەندین بەندکراوانی کوردی لە ساڵی 1984 کوشتووە.

- نیعمە محەممەد سوهەیل، یەکێک لە تاوانبارە گەورەکانی ڕژێمی سەدام بووە و زیاتر لە 40 خوێندکاری زانکۆی سلێمانیی کوشتووە و ئەشکەنجەداوە.

زانیاریی زیاتر: لە مانگی 6ـی ساڵی 2024 هێزە ئەمنییەکانی عێراق بەرپرسێکی باڵای ڕژێمی پێشووی بەعسیان دەستگیر کرد، دانى بەوەدانا کە فەرمانى لە سێدارەدانى محەمەد باقر سەدر و خوشکەکەی جێبەجێ کردووە.

ئەمەش بزانە: محەممەد باقر سەدر، بە یەکێک لە مەرجەعەکانی شیعە مەزهەب و بیرمەندان دادەنرێت، هاوکات دامەزرێنەری حیزبی دەعوەی ئیسلامی بوو لە عێراق، لە سەردەمی ڕژێمی حیزبی بەعس فەتوای حەڕامکردنی پەیوەندیکردنی بەو حیزبە دا و پاڵپشتیی کۆماری ئیسلامی ئێرانی کرد کە بووە هۆی دەستگیرکردن و لەسێدارەدانی.