هۆشیار زێباری: عێراق لە پەیوەندی لەگەڵ سووریا نوێ دواکەوتووە

ئاڤا نیوز

 

وەزیری پێشووی دەرەوەی عێراق ڕایدەگەیێنێت، عێراق لە پەیوەندی لەگەڵ سووریای نوێ بە پێچەوانەی چەند وڵاتێکی عەرەبی، دواکەوتوو  و ئاماژە بۆ ئەوەش دەکات "لە بەرژەوەندی وڵاتدایە بە شێوەیەکی ئەرێنی مامەڵەیان لەگەڵدا بکات".

 

وێنە گەورەکە: دوای کۆتاییهاتنی ڕژێمەکەی ئەسەد و دەستنیشانکردنی ئەحمەد شەرع وەک سەرۆککۆماری سووریا بۆ قۆناغی ڕاگوزەر، لەو ماوەیەدا بەشێکی زۆری وڵاتانی عەرەبی و دراوسێی سووریا و تەنانەت جیهانیش پەیوەندی بەهێزیان لەگەڵ ئیدارەی نوێی سووریا هەیە.

 

پەیامی فەرمی: هۆشیار زێباری، وەزیری پێشووی دەرەوەی عێراق لە پەیامێکدا لە تۆڕی ئێکس نووسیویەتی: حکومەتی عێراق لە پەیوەندیکردن لەگەڵ سەرکردایەتی نوێی سووریا دواکەوتووە، بە پێچەوانەی وڵاتانی دیکەی عەرەبی دراوسێی وەک ئوردن، کوەیت، سعودییە، قەتەر، فەلەستین، لوبنان، عەممان و بەحرەین.

 

زانیاریی زیاتر: زێباری ئەوەشی نووسیوە، لە بەرژەوەندی وڵاتدایە بە شێوەیەکی ئەرێنی مامەڵە لەگەڵ ئەو بارودۆخەی ئێستادا بکات وەک ئەوەی هەیە. چونکە بوونی ئاژاوەگێڕی لە سووریا ڕاستەوخۆ هەڕەشە لە ئاسایش و سەقامگیری عێراق دەکات.

 

باکگراوند: ڕۆژی 08-12-2024، هێزەكانی ئۆپۆزیسیۆنی سووریا گەیشتنە دیمەشقی پایتەختی ئەو وڵاتە و كەوتنی دەسەڵاتی بەشار ئەسەدیان ڕاگەیاند، ڕۆژی 29-1-2025 ئەحمەد شەرع وەک سەرۆککۆماری سووریا بۆ قۆناغی ڕاگوزەر دەستنیشان کرا.