بە ئامادەبوونی سەرۆكوەزیران مەسرور بارزانی ڕێوڕەسمی ساڵیادی شەهیدانی یەكی شوبات بەڕێوەچوو

ئاڤا نیوز

 

لە مۆنۆمێنتی شەهیدانی یەكی شوبات لە شاری هەولێر، بە ئامادەبوونی سەرۆكوەزیران مەسرور بارزانی و كونسوڵی وڵاتان و بەرپرسانی پارتی و یەكێتی و كەسوكاری شەهیدان، ڕێوڕەسمی ساڵیادی شەهیدانی یەكی شوبات بەڕێوەچوو.

 

چیرۆكی سەرەكی: ڕێككەوتی 1-2-2004 لە یەکەم رۆژی جەژنی قوربان، لە هەردوو بارەگای لقی دووی پارتی و مەڵبەندی سێی یەکێتی دوو تەقینەوەی خۆکوژی ڕوویاندا، بووە هۆی شەهیدبوونی 103 کەس كە ژمارەیەكیان سەركردە و بەرپرسی هەردوو ئەم دوو حیزبە بوون و 246 کەسی دیکەش برینداربوون، لەو كاتەوە تاوەكوو ئێستا ساڵانە لە شاری هەولێر ڕێوڕەسمێك بۆ یادكردنەوەی شەهیدان و ڕێزگرتن لە ڕۆحیان ڕێوڕەسمی تایبەت بەڕێوەدەچێت.

زانیاریی بەدەستهاتوو: لەڕێوڕەسمەكەی ئەمڕۆدا، كە كاتژمێر (10:00)ی پێشنیوەڕۆ بەڕێوەچوو، سەرۆكوەزیران مەسرور بارزانی ئامادە بوو و تاجەگوڵینەی لەسەر مۆنۆمێنتی شەهیدانی یەكی شوبات دانا، هاوكات تاجەی گوڵینەی سەرۆكی هەرێمی كوردستان و هەردوو مەكتەبی سیاسی پارتی و یەكێتی و كونسوڵی وڵاتان لە شاری هەولێر و كەسوكاری شەهیدان و نوێنەری دامودەزگا حكومی و حیزبییەكان لەسەر مۆنۆمێنتەكە دانرا.