نێچیرڤان بارزانی: باشترین وەفاداری بۆ گیانی شەهیدان تەنها تەبایی و یەکڕیزییە

ئاڤا نیوز

 

21  ساڵ بەسەر تەقینەوەکانی یەكی شوبات تێپەڕ دەبێت و نێچیرڤان بارزانی، سەرۆکی هەرێمی کوردستان لە پەیامێکدا دەڵیت، باشترین وەفاداری بۆ گیانی شەهیدان و ڕاستترین ڕێگەش بۆ بەرەنگاربوونەوەی تیرۆریستان، تەنها تەبایی و یەکڕیزییە.

 

چیرۆکی سەرەکی: ئەمڕۆ شەممە 1-2-2025، ساڵڕۆژی تەقینەوەکانی لقی دووی پارتی دیموكراتی كوردستان و مەڵبەندی سێی یەکێتی نیشتمانیی كوردستان لە مۆنۆمێنتی شەهیدانی یەكی شوبات لە شاری هەولێر بە ئامادەبوونی سەرۆکوەزیران مەسرور بارزانی و نوێنەری وڵاتان لە هەرێمی کوردستان بەڕێوەچوو.

 

پەیامی فەرمی: لە ساڵیادەکە نێچرڤان بارزانی، سەرۆکی هەرێمی کوردستان پەیامێکی بڵاوکردەوە و ڕایگەیاند:

 

- له‌ بیرەوەریی ساڵیادی شه‌هیدانی یەکی شوباتدا، بەوپەڕی ڕێز و شکۆوە یادی شەهیدانمان دەکەینەوە و سەری ڕێز و نەوازش بۆ گیانی پاکیان دادەنەوێنین.

 

-شه‌هیدانی یەکی شوبات بوونە سیمبۆلی خوێنی پێکەوەڕژاوی کوردستانییان بە دەستی تیرۆریستان کە بەبێ هیچ جیاوازییەک، گیانی ئەو پۆلە سەرکردە و تێکۆشەرەی گەلەکەمان و هاووڵاتییانی سڤیلی کوردستانیان کردە ئامانج.

 

-پێویستە ساڵانە ئەم یادە و بیرهێنانەوەی ئەو تاوانە تیرۆریستییە بکەینە دەرفەتێک بۆ بەخۆداچوونەوە و هەوێنی پتەوکردنەوەی برایەتی و پێکەوەیی و هاوچارەنووسیمان.

 

-باشترین وەفاداری بۆ گیانی شەهیدان و ڕاستترین ڕێگەش بۆ بەرەنگاربوونەوەی تیرۆریستان، تەنها تەبایی و یەکڕیزییە، هەر بەوەش دەتوانین ده‌ستکه‌وت و مافەکانمان بپارێزین و ئامانجەکانمان بپێکین.

 

ئەوەی پێویستە بیزانیت: یەكی شوباتی ساڵی 2004 کە یەکەم رۆژی جەژنی قوربانیش بوو، لە هەردوو بارەگاکەی پارتی و یەکێتی دوو تەقینەوەی خۆکوژی ڕوویاندا، تێیدا 103 سەرکردەی دیار و خه‌ڵكی سڤیل شەهید بوون و 103 کەسیس بریندار بوون.