باڵیۆزی بەریتانیا: ڕەنگە هەندێک سوپرایزی لەناکاو لە عێراق ڕووبدات

ئاڤا نیوز

باڵیۆزی بەریتانیا لە عێراق هۆشداری دەدات لەوەی ڕەنگە ڕووداوی لەناکاو ڕوو لە عێراق بکات، کە لە دەرەوەی خواستەکانی بەریتانیا بێت. 

 

وێنە گەورەکە: بەگوێرەی هەڵسانگاندنی سیاسەتمەداران و کەسایەتییە ناودارە ناوخۆیی و جیهانییەکان، عێراق لەنێو زریانی ساتی گۆڕانكارییە ناوچەیی و نێودەوڵەتییەكاندایە، هاوکات تەنیا بەچاکسازی ڕیشەیی لە بەڕێوەبردنی وڵات لەسەر ئاستی ناوخۆ و دەرەوە دەتوانێت بە سەلامەتی لێی دەربچێت.

 

لێدوانی فەرمی: لەمیانی دیدارێکدا لەگەڵ یەکێک لە میدیاکانی عێراق ستیڤن هيتشن، باڵیۆزی بەریتانیا لە عێراق ڕایگەیاند: ڕەنگە هەندێک سوپرایزی لەناکاو لە عێراق ڕووبدات لە دەرەوەی خواستەکانی ئێمە بێت، پێدەچێت ئەو ڕووداوانەش هەڵقوڵاوی ناوخۆی عێراق بێت یاخود کاریگەری دەرەکی لەسەر بێت.

 

زانیاریی زیاتر: هيتشن ئاماژەی بەوەشکرد، عێراق دەکەوێتە نێوان ئەو وڵاتانەی کە لە بنەڕەتدا ململانێی سیاسی و ململانێی دەسەڵاتییان لە ناوچەکەدا هەیە، وەک وڵاتانی ئەنادۆڵ و فارس و دورگەی عەرەبی.

 

قووڵتر: باڵیۆزی بەریتانیا پێیوایە پێویستە دەسەڵاتدارانی عێراق گرنگی بە چارەسەکردنی کێشەکان بدەن و پێش ڕووداوی نەخوازراو بکەون و بەرنامەکانی چاکسازی لە وڵاتەکەیان بەزووترین کات جێبەجێ بکەن. 

 

گۆشەیەکی دیکەی دیمەنەکە: ئەمینداری گشتیی بزووتنەوەی "ئەلوەفا"ـی عێراقی ڕایگەیاند، "کارەساتە وەستان لەسەر گردێک کە ڕەنگە بە واژۆیەک بڕووخێت". حەیدەر عەبادی، سەرۆكی هاوپەیمانی نەسریش هۆشداری دەدات لەوەی ناوچەكە بە ساتی گۆڕانكاری تێپەڕدەبێت و عێراقیش لە چاوی زریاندایە.

 

چاره‌سه‌ره‌كان: چاودێرانی سیاسی پێیان وایە، لەکاتێکدا لێدوانەکانی هەندێک لە کەسایەتی و سیاسەتمەدارەکان زۆر ڕه‌هه‌ند له‌ خۆ ده‌گرێت، گرنگە هۆشداری ده‌وڵه‌ته‌ زلهێزه‌کانی جیهان بەهەند وەربگیرێت.