ئەنجوومەنی نوێنەرانی عێراق بۆ دەنگدان لەسەر پڕۆژە یاسایەکی گرنگ کۆدەبێتەوە

ئاڤا نیوز

 

بڕیارە ئەمڕۆ یەکشەممە، ئەنجوومەنی نوێنەرانی عێراق کۆببێتەوە و هەمواری یاسای گشتیی بودجەی فیدراڵی بخاتە دەنگدانەوە کە بڕگەیەکی پەیوەستە بە هەناردەکردنەوەی نەوتی هەرێمی کوردستان. 

 

وێنە گەورەکە: دوای چەندین جار لە دروستکردنی بەربەست لەبەردم تێپەڕاندنی هەمواری یاسای بودجە، ئەمڕۆ یەکشەممە 2-2-2025، دانیشتنی پەرلەمان دەکرێت و بەپێی کارنامەی دانیشتنەکە چوار بڕگەی گرنگ لەخۆ دەگرێت.

 

زانیاریی زیاتر: بڕیارە دانیشتینی ئەنجوومەنی نوێنەران لە کاتژمێر 01:00ی دوا نیوەڕۆ دەستپێبکات و بەپێی کارنامەی دانیشتنەکە چوار بڕگە لەخۆ دەگرێت:

 

- دەنگدان لەسەر هەمواری یاسای بودجەی گشتی فیدراڵی بۆ ساڵەکانی 2023-2024-2025.
- دەنگدان لەسەر پێشنیازە یاسای هەمواری یەکەمی یاسای بنەماکانی هاوتاکردنی بڕوانامە و پلە زانستییەکانی عەرەبی و بیانی.

- دەنگدان لەسەر بڕیار بەشێوەی ڕاسپاردە بۆ وەزارەتی پەروەردە بۆ کارکردن بە سيستمى پەڕینەوە (عبور) لە خوێندندا.

-خوێندنەوەی دووەم بۆ پێشنیازە یاسای خوێندنی باڵا-ناحکومی.

 

ئەوەی پێویستە بیزانیت: تاوەکو ئێستا دیار نییە دەنگ بە پڕۆژەکە دەدرێت یان نا، چونکە بەشێک لەلایەن سیاسییەکانی عێراق تاوەکو ئێستا خۆیان یەکلایی نەکردووە ئاخۆ دەنگ لەسەر پەسەندکردنی هەموارەکە دەدەن یان نا، بەتایبەتی فراکسیۆنی دەوڵەتی یاسا کە نووری مالیکی، سەرۆکوەزیرانی پێشووتری عێراق سەرۆکایەتیی دەکات و بەشێکی دیکەی چوارچێوەی هەماهەنگی و لایەنە شیعەکان.

 

لێدوانی فەرمی: لەکاتێكدا فراکسیۆنە کوردەکان بەشداریی کۆبوونەوەکە دەکەن و دەنگ لەسەر هەموارەکەش دەدەن، لەمبارەیەوە جەمال كۆچەر، سەرۆكی فراكسیۆنی یەكگرتوو لە پەرلەمانی عێراق بە ئاڤا میدیای ڕاگەیاند: فراكسیۆنە كوردستانییەكان سەرجەمیان بەشداریی دانیشتنەكەی دەكەن و سوننەكانیش هیچ كێشەیەكیان نییە و بەشدار دەبن، بەڵام شیعەكان بوونەتە چەند بەرەیەک و ئەگەری ئەوە هەیە سەرجەمیان بەشدار نەبن.