پرۆسەی چاکسازیی هێزەكانی پێشمەرگە خێراتر دەكرێت

ئاڤا نیوز

وەزیر و بەرپرسانی باڵای وەزارەتی پێشمەرگە و ژمارەیەك لە بەرپرس و ڕاوێژكارانی سەربازیی هاوپەیمانان كۆبوونەوە و تاوتوێی پرسی یەكگرتنەوەی هێزی پێشمەرگەی كوردستانیان كرد.

چیرۆکی سەرەکی: ئەمڕۆ دووشەممە 2025-02-03، شۆڕش ئیسماعیل، وەزیری کاروباری پێشمەرگە و عەبدولخالق باپیری، بریکاری وەزارەت و لیوا روکن بەختیار محەممەد سدیق ئەمینداری گشتی، لەگەڵ کۆڵۆنێڵ براندستێتەر بەرپرسی راوێژکارانی سەربازی هاوپەیمانان لە هەرێمی کوردستان و کۆڵۆنێڵ گاڤین ڕایس، بەرپرسی نووسینگەی هاریکاری ئاسایش لە کونسوڵخانەی گشتیی ئەمریکا لە هەولێر، كۆبوونەوە.

لێدوانی فەرمی: شۆڕش ئیسماعیل، وەزیری پێشمەرگە ڕایگەیاند: لەبارەی بەرەوپێشچوونەکانی پرۆسەی چاکسازی و کاروباری ڕێکخستنەوە و یەکخستنەوەی هێزی پێشمەرگەی کوردستان لەگەڵ تیمی راوێژکارانی باڵای هاوپەیمانان هەڵسەنگاندنێکی گشتگیرمان لە سەرجەم بوارەکانی چاکسازی ئەنجام داوە، تاووتوێی کۆمەڵێک پرسی گرنگ و تایبەتمەندیان سەبارەت بە هەردوو ناوچەیی سەرکردایەتی و بنیاتنانی فیرقەکان و یەک یەکەی ژمێریاری یەکگرتوو بۆ وەزارەتی پێشمەرگە کرد.

- وەزیری پێشمەرگە گوتیشی: وەزارەتی پێشمەرگە لە سەرەتایی قۆناغێکی نوێدایە بە دامەزراندنی دوو ناوچەی سەرکردایەتیی و بونیادنانی فیرقەی زیاتر هەنگاو دەنێت بەرەو سوپایەکی نیشتمانی کوردستانی، کە لە ئاستی بەرپرسیارێتی و داخوازییە ڕەواکانی گەلەکەماندا بێت.

زانیاریی زیاتر: کۆبوونەوەکە، بە سەرنج و تێبینی گرنگ و ئاماژەدان بە هەنگاوی کاری داهاتوو و هەماهەنگی زیاتر لە ئایندە و خوێندنەوە بۆ قۆناغی ئاییندەی هێزی پێشمەرگەی کوردستان لەلایەن ئامادەبووانەوە گفتوگۆی لەبارەوە کراو، بڕیاردرا هەنگاوی جددی و پێویست بنرێت بۆ چارەسەرکردنی کێشەکان و ئاستەنگەکانی بەردەم پڕۆسەی چاکسازی خێرا و بەردەوام.