نەخۆشخانەی نانەکەلی ڕوونکردنەوەیەک لەبارەی زۆربوونی ژمارەی تووشبوانی شێرپەنجە دەدات

ئاڤا نیوز

 

بەڕێوەبەری نەخۆشخانەی شێرپەنجە دەڵێت، ساڵی ڕابردوو بەراورد بە ساڵێک پێش خۆی، تووشبوانی شێرپەنجە کەمتر تۆمار کراون و ئەوەی لەو بارەیەوە دەوترێت ڕاست نییە.

 

وێنە گەورەکە: ڕۆژی 4ـی شوباتی هەموو ساڵێک وەک ڕۆژی بەرەنگاربوونەوەی نەخۆشی شێرپەنجە دیاریکراوە، لە هەرێمی کوردستان چەندین چالاکی ئەنجام دەدرێن بۆ هۆشیارکردنەوەی کۆمەڵگە لەو نەخۆشییە.

 

لێدوانی فەرمی: د.هەری جەواد، بەڕێوەبەری نەخۆشخانەی نانەکەلی لە هەولێر بە ئاڤا میدیای وت، ئەوەی دەوترێت نەخۆشی شێرپەنجە وەک پەتایەک بڵاوبووەتەوە لەناو کۆمەڵگە، ڕاست نییە و ڕێژەکەی جێگیرە. باوترین جۆری شێرپەنجە لە هەرێمی کوردستان، شێرپەنجەی مەمکە کە یەک لەسەر چواری تووشبوانی شێرپەنجە پێکدەهێنن. لەدوای ئەوە شێرپەنجە قۆڵۆن و کۆئەندامی هەرس دێت.

 

ژمارەکان وادەڵێن: د.هەردی جەواد دەڵێت: ساڵی 2023 لە نەخۆشخانەی نانەکەلی، ژمارەی ئەو دۆسیانەی بۆ نەخۆش کراونەتەوە هەزار و 800 فایل بووە، لەو ژمارەیە هەزار و 250 کەیسیان شێرپەنجە دەرچووە. بەڵام ساڵی 2024 بە هەمان شێوە هەزار و 800 فایل بۆ نەخۆش کراونەتەوە، لەو ژمارەیە هەزار و 100 کەیسیان شێرپەنجە دەرچوون. ئەمەش واتا ژمارەکەیان زیاتر لە 150 تووشبوو کەمبووەتەوە.

 

هۆکارە زانراوەکان: بەگوێرەی وتەی بەڕێوەبەری نەخۆشخانەی نانەکەلی، هۆکاری جیاواز دەبێتە هۆی تووشبوون بە شێرپەنجە، وەک تەمەنی کۆمەڵگە، ژمارەی دانیشتوان، پیسبوونی ژینگە؛ مەبەست لێی ژینگەی ئاو و هەوا و خاک دەگرێتەوە.

 

ئەوەی پێویستە بیزانیت: ئەو بڕە دەرمانەی لە بەغدا دێت، بەشی نەخۆشخانەکانی شێرپەنجە ناکات، سەرۆکوەزیران مەسرور بارزانی بودجەیەکی تایبەتی تەرخانکردووە بۆ نەخۆشخانەکانی شێرپەنجە لە هەر سێ پارێزگا، جگە لە سندوقی هاوکاری تووشبووانی نەخۆشی شێرپەنجە. لەم دوو سەرچاوەیە دەرمان بۆ نەخۆشخانەکان تەرخان دەکرێت، ئەمەش وتەی د.هەردی جەوادە.