تورکیا و سووریا کار لەسەر ستراتیژی هاوبەش بۆ ڕووبەڕووبوونەوەی هەڕەشە ئەمنییەکان دەکەن

ئاڤا نیوز

 

سەرۆککۆماری تورکیا ئامادەیی وڵاتەکەی بۆ ڕووبەڕووبوونەوەی "ڕێکخراوە تیرۆریستییەکان" بۆ ئەحمەد شەرع دووپات دەکاتەوە و سەرۆکی سووریاش بۆ قۆناغی ڕاگوزەر جەخت لەسەر گۆڕینی پەیوەندی لەگەڵ تورکیا بۆ هاوبەشییەکی ستراتیژی قووڵ لە هەموو بوارەکاندا دەکاتەوە.

 

وێنە گەورەکە: ئەحمەد شەرع، سەرۆکی سووریا بۆ قۆناغی ڕاگوزەر، لە دووەم سەردانی فەرمی بۆ دەرەوەی وڵات گەشتە ئەنقەرە و لە کۆشکی کۆماریی، لەگەڵ ڕەجەب تەیب ئەردۆغان سەرۆککۆماری تورکیا کۆبوونەوە.

 

لێدوانی ڕۆژنامەوانی: دوای کۆبوونەوەیان لەگەڵ ئەحمەد شەرع، سەرۆکی سووریا بۆ قۆناغی ڕاگوزەر، ڕەجەب تەیب ئەردۆغان، سەرۆککۆماری تورکیا لە کۆنگرەیەکی ڕۆژنامەوانی هاوبەشدا ڕایگەیاند:

- گەلی سوریا زیاتر لە 13 ساڵە بەدەست نادادپەروەری و کوشتن بە هەموو شێوەکانییەوە دەناڵێنێت.
- سەرەڕای ترسناکیی ئەو شتانەی کە سوورییەکان تووشی بوون، بەڵام تا سەرکەوتنیان بەدەست نەهێنا دەستبەرداری خەباتی خۆیان نەبوون.
- لاپەڕەیەکی نوێ دەستی پێکردووە، نەک تەنها لە سووریا، بەڵکو لە هەموو ناوچەکە.
- ئەم سەردانەی سەرۆکی سووریا بۆ وڵاتەکەمان مێژووییە.
- لەگەڵ سەرۆکی سووریا گفتوگۆم لەسەر هەنگاوە پێویستەکان کرد بۆ گەیشتن بە سەقامگیری ئەمنی و ئابووری لە سووریا.
- سەرۆکی سووریام دڵنیا کردەوە لە ئامادەییمان بۆ پێشکەشکردنی پاڵپشتی پێویست لە ڕووبەڕووبوونەوەی ڕێکخراوە تیرۆریستییەکان بە هەموو شێوەکانیانەوە.
- جەختمان لەسەر پێویستی ئیدارەیەکی سووریا کردەوە کە ڕەنگدانەوەی ئیرادەی گەل بێت.
- گەمارۆ نێودەوڵەتییەکان بۆ سەر سووریا ڕێگرن لە گەشەی ئەو وڵاتە و هەوڵی لابردنی ئەو گەمارۆیانە دەدەین.
- بەردەوام دەبین لە پتەوکردنی پەیوەندییەکانمان لەگەڵ سووریا لە هەموو بوارەکاندا.
- پێویستە وڵاتانی عەرەبی و ئیسلامی پشتیوانی لە ئیدارەی نوێی سووریا بکەن.

 

لەلایەکی دیکە: ئەحمەد شەرع، سەرۆکی سووریا بۆ قۆناغی ڕاگوزەر لە کۆنگرە ڕۆژنامەوانییەکە ڕایگەیاند:

- لەگەڵ تورکیا لەسەر دۆسیە سەرەکییەکان  دەستمان بە کارکردن کردووە، دیارترینیان دروستکردنی ستراتیژی هاوبەشە بۆ ڕووبەڕووبوونەوەی هەڕەشە ئەمنییەکان.
- گەلی سووریا پشتیوانی تورکیا لەبیر ناکات.
- پەیوەندی نێوان سووریا و تورکیا پەیوەندییەکی مێژوویی و جوگرافییە.
- جەخت لەسەر گۆڕینی پەیوەندی لەگەڵ تورکیا دەکەینەوە بۆ هاوبەشییەکی ستراتیژی قووڵ لە هەموو بوارەکاندا.
- هەوڵ و پەرۆشی سەرۆک ئەردۆغان بۆ سەرخستنی قۆناغی ڕاگوزەر لە سووریا بەرز دەنرخێنین.