سێ یاساکەی پەرلەمانی عێراق ناکۆکی لەنێوان دادگای فیدراڵی و ئەنجوومەنی دادوەری دروست دەکات

ئاڤا نیوز

بڕیارەکەی دوێنێی دادگای فیدراڵی لەبارەی ڕاگرتنی جێبەجێکردنی هەرسێ یاسای لێبوردنی گشتی، یاساى باری کەسی و یاساى گەڕانەوەی زەویوزار بۆ خاوەنەکانیان لەناوچە جێناکۆکەکان کاردانەوەی بەدوای خۆیدا هێنا.

ئەو مانایەی دەیگەیێنێت: ئەم بڕیارە هەموانی شۆک کرد، ئەوەی کە زۆر توڕە بوو سوننەکان بوون، چوونکە ماوەیەکی زۆرە هەوڵی ئەوە دەدەن یاسای لێبوردنی گشتی دەربکەن و دەیان هەزار زیندانیکراوی سوننە ئازاد بکەن، وەکو خۆیان دەڵێن، بەناحەق دەستگیرکراون.

لێدوانی فەرمی: فایەق زەیدان، سەرۆکی ئەنجوومەنی باڵای دادوەری هاتە سەر خەت و گوتی، بڕیارەکەی مەحکەمەی فیدراڵی بۆ ڕاگرتنی جێبەجێکردنی ئەو یاسایانەی پەرلەمان پەسەندی کردوون کاتییە و ئێمە وەکو دادگاکانی عێراق پابەندی نابین و یاساکان جێبەجێ دەکەین، بەتایبەتیش یاسای لێبوردنی گشتی.

بۆچوونی بەرامبەر: دادگای فیدراڵی لە وەڵامی فایەق زەیدان دەڵێ، هەموو بڕیارەکانمان بەپێی دەستوورە و دەبێ هەمووان پێوەی پابەند بن.

ئەوەی پێویستە بیزانیت: جاسم عومێری، سەرۆکی دادگای فیدراڵی سەر بە ڕێکخراوی بەدرە کە  هادی عامری سەرۆکایەتیی دەکات. هاوکات فایەق زەیدان، سەرۆکی ئەنجوومەنی باڵای دادوەریش لە قەیس خەزعەلی و حەلبوسییەوە نزیکە.

ئەمەش بزانە: ئەم دوو دەسەڵاتە دادوەرییە چەندان قەراریان لە دژی هەرێمی کوردستان  داوە و شەڕیان بە هەرێمی کوردستان دەفرۆشت، ئێستاش شەڕەکە چووەتە بەر دەرگای خۆیان و یەکتر تۆمەتبار دەکەن بەوەی بڕیارەکانیان نادەستووری و سیاسییە.