لە حاجی ئۆمەران بەفر بارین ئاستەنگ بۆ شۆفێران دروست دەکات

ئاڤا نیوز

بەهۆی بارینی بەفرێکی زۆر لەسنووری حاجی ئۆمەران ئاستەنگ بۆ هاتووچۆ دروست بووە، بەڕێوەبەری بەڕێوەبەرایەتیی چاککردن و پاراستنی ڕێگاوبانی سۆران دەڵێت 'تیمەکانمان سەرقاڵی پاککردنەوەی ڕێگاکەن'.

وێنە گەورەکە: لە شەوی چوارشەممە 2025-02-05، شەپۆلێکی بەفر و باران و خۆڵبارین ڕووی لە هەرێمی کوردستان کردووە، بەوهۆیەشەوە لە هەندێک ناوچە بەهۆی زۆری بەفر بارین ئاستەنگ بۆ هاتووچۆ دروست بووە.

لێدوانی فەرمی: ئەندازیار خوسرەت سادق، بەڕێوەبەری بەڕێوەبەرایەتیی چاککردنەوە و پاراستنی ڕێگاوبانی سۆران، بە ئاڤا میدیای ڕاگەیاند: لە کاتژمێر 05:00ـی سەرلەبەیانییەوە تیمەکانمان دەستیان بە ڕاماڵینی بەفری سەر شەقامەکان کردووە، بۆ ئەوەی ئاستەنگ بۆ هاتووچۆ دروست نەبێت، لە هەر جێیەک جوڵەی هاتووچۆ وەستابێت بکرێتەوە.

زانیاری زیاتر: تیمەکان بەردەوامن لە ڕاماڵینی بەفر و بەستەڵەکی سەر ڕێگاکان و بەتایبەت ڕێگای چۆمان - حاجی ئۆمەران، بۆ ئەوەی بەتەواوی ڕێگاکە دانەخرێت و هاتووچۆ بەتەواوی ڕانەوەستێت.

ئەوەی پێویستە بیزانیت: ڕێگای چۆمان - حاجی ئۆمەران بە ڕێگایەکی ستراتیژیی دادەنرێت، کە درێژییەکەی 21 کیلۆمەترە و ڕۆژانە هاتووچۆی بازرگانی و گەشتیاری زۆری لەسەرە.