دادگەکانی عێراق گوێ بە بڕیارەرکەی دادگەی فیدڕاڵی نادەن

ئاڤا نیوز

هەر یەک لە دادگاکانی تێهەڵچوونەوەی قادسیە، نەجەف، بەسرە، ئەنبار و مەیسان بە پشت بەستن بە ڕێنماییەکانی ئەنجوومەنی باڵای دادوەری کار لەسەر جێبەجێکردنی یاسای لێبووردنی گشتی دەکەن کە پێشتر لەلایەن دادگەی فیدراڵییەوە بە فەرمانێکی سالاری کارکردن بەو یاسایە ڕاگیرابوو.

وێنە گەورەکە: بەریەككەوتنی دەسەڵاتەکانی یاسادانان لە عێراق و یەکلاکردنەوەی ناکۆکیی نێوان لایەنە سیاسییەکان لەڕێگەی دەسەڵاتەکانی یاسادانانەوە خەریکە قووڵتر دەبێتەوە و لە کۆنترۆڵ دەردەچێت.

بڵاوکراوەی فەرمی: بە گوێرەی نووسراوێکی سەرۆکایەتی دادگەی تێهەڵچوونەوەی قادسیە، نووسینگەی سەرۆکی دادگە لە ڕێکەوتی 2025-02-06، واتە ئەمڕۆ دەرچووە و ئاراستەی گشت دادگەکانی سەر بە سەرۆکایەتییەکەیانی کردووە، داوایان لێدەکات پاڵپشت بە ڕێنماییەکانی ئەنجوومەنی باڵای دادوەری کار بە یاسای لێبووردنی گشتی بکەن.

بە تەنیشت ئەو بابەتەوە: ڕۆژی سێشەممە 2025-02-04، دادگەی تاوانەکانی نەجەف کارکردنیی بە یاسای لێبوردنی گشتیی ڕاگەیاند.

- بە گوێرەی نووسراوێکی دادگەی تاوانەکانی نەجەف بە سەرۆکایەتیی دادوەر ئەحمەد عەبدولئەمیر عەتیە و ئەندامێتی دادوەران ئەحمەد عەبدولمەجید عەبدولعەباس و ئەسیر عەبدولحوڕ جەبر، لیژنەیەک بۆ تاوتوێکردنی جێبەجێکردنی بڕگەکانی یاسای لێبوردنی گشتی (هەمواری دووەم) پاڵپشت بە ڕێنماییەکانی ئەنجوومەنی باڵای دادوەری پێکهێنرا، بۆ سەیرکردنی یەکەم دۆسیە لەو بارەیەوە.

زانیاریی بەدەستهاتوو: دادگەی تێهەڵچوونەوەی مەیسان دوای بڕیارەکە، یەکەم بەندکراوی ئازاد کرد کە بڕیاری لێبووردنی گشتی دەیگرتەوە.

ئەوەی پێویستە بیزانیت: 4ـی ئەم مانگە دادگەی فیدڕاڵی عێراق فەرمانێکی سالاری دەرکرد و بەشێوەیەکی کاتی کارکردنی بە هەرسێ یاسای گەڕانەوەی زەوییە کشتوکاڵییەکان بۆ خاوەنە ڕەسەنەکانیان و باری کەسێتی و لێبوردنی گشتی ڕاگرت، تا ئەو کاتەی ئەو سکاڵایانەی لەبارەیانەوە تۆمارکراون لەلایەن دادگاکەوە یەکلایی دەکرێنەوە.

کاریگەریی و لێکەوتەکان: ئەنجوومەنى باڵاى دادوەریى عێراق لەسەر فەرمانە وەلائییەکەی دادگەی فیدراڵی هاتە دەنگ و ڕایگەیاند بڕیارەکەی دادگای فیدڕاڵی کاتییە و پابەندکەر نییە چونکە مەرجى دەرکردنى ئەو بڕیارەى تێدا نەبووە.

بۆچوونی لایەنی بەرامبەر: دادگەی فیدڕاڵی لەڕاگەیێنراوێکدا وەڵامی ئەنجوومەنى باڵاى دادوەریى دایەوە و ئاماژەی بەوەکرد، فەرمانە سالارییەکە بەپێی بڕگەکانی ماددەی 94 ـی دەستوور، کۆتایی و پابەندکەرن بۆ سەرجەم دەسەڵاتەکان و نابێت بەهیچ شێوەیەک پێشێل بکرێت.