لە بەغدا كۆنفرانسی نێودەوڵەتیی بەرەنگاربوونەوەی تاوانە ڕێكخراوەكان بەڕێوەچوو

ئاڤا نیوز

بە بەشداری 12 دادوەریی ئاستی باڵای فەرەنسا، كۆنفرانسی نێودەوڵەتی بەرەنگاربوونەوەی تاوانە ڕێكخراوەكان لە شاری بەغدا بەڕێوەچوو، نوێنەرێكی وەزارەتی دادی حكومەتی هەرێمی كوردستانیش بەشدار بوو.

وێنە گەورەكە: بە ئامادەبوونی فایەق زێدان، سەرۆكی ئەنجوومەنی باڵای دادوەریی عێراق و پاتریك دۆرێل، باڵیۆزی فەرەنسا لە عێراق و 12 دادوەریی فەرەنسی لەئاستی باڵا و بەڕێوەبەری كاروباری یاسایی وەزارەتی دادی هەرێمی كوردستان، لە شاری بەغدا كۆنفرانسی (بەرەنگاربوونەوەی تاوانە ڕێكخراوەكان) بەڕێوەچوو كە وەزارەتی دادی فەرەنسا بەهەماهەنگی ئەنجوومەنی باڵای دادوەریی عێراق و وەزارەتی دادی حكومەتی هەرێمی كوردستان ڕێكیخستبوو. 

ڕاگەیێنراوی فەرمی: ماڵپەڕی فەرمی حكومەتی هەرێمی كوردستان بڵاویكردووەتەوە، بەڕێوەبەری كارووباری یاسایی لە وەزارەتی دادی حكومەتی هەرێمی كوردستان لە پاڵ ژمارەیەك پسپۆڕ و دادوەری نێودەوڵەتی و عێراقی بەشداری لە پانێلەكانی كۆنفرانسەكە كرد.

بۆچی گرنگە: هەرێمی كوردستان مەبەستیەتی لە بواری دادوەری و یاسایی، هەماهەنگی و هاریكاری لەگەڵ فەرەنسا و عێراق بكات، بەئامانجی سوودمەندبوون لە ئەزموونی دەوڵەمەندی دادوەرانی فەرەنسا، بەتایبەت لە بەرەنگاربوونەوەی تاوانە ڕێكخراوەكان كە ئەو جۆرە تاوانانە بۆ هەرێمی كوردستان تا ڕاددەیەك ئەزموونێكی نوێیە.

ئەوەی پێویستە بیزانیت: بەگوێرەی پۆلێنی بەڕێوەبەرایەتیی بەرەنگاربوونەوەی تاوانە ڕێكخراوەكان لە هەرێمی كوردستان بەپشتبەستن بە داتای بەفەرمی ناساندنی نەتەوە یەكگرتووەكان، هەریەك لە تاوانەكانی: بازرگانیكردن بە مرۆڤ، بەكارهێنانی كرێكار و كەسانی بیانی بۆ بازرگانیی سێكسی، كڕین و فرۆشتنی ئەندامەكانی جەستەی مرۆڤ، بەكارهێنانی منداڵی خوار تەمەنی پێگەیشتوویی بۆ سواڵكردن و كاری سێكسی، كاری سوغرە و زۆرەملێ بە كرێكاری بیانی، تاوانی بەقاخبردنی پەنابەران و كۆچبەران، لە دیارترین ئەو تاوانانەی كە وەك تاوانی ڕێكخراو هەژماركراون و سزای قورس بۆ ئەنجامدەرانی دیاریكراوە.