هەوڵێکی ئەحمەد شەرع عێراق نیگەران دەکات

ئاڤا نیوز

وەزیری کۆچ و کۆچبەرانی عێراق ڕایدەگەیێنێ، وڵاتەکەی نیگەرانە لە هەوڵەکانی ئەحمەد شەرع، سەرۆککۆماری سووریا بۆ قۆناغی ڕاگوزەر بۆ هەڵوەشاندنەوەی کەمپی هۆڵ.  

 

چیرۆکی سەرەکی: کەمپی هۆل دەکەوێتە پارێزگای حەسەکە لە ڕۆژئاوای کوردستان و ئیدارەی خۆبەڕێوەبەری سووریا (خۆسەر) سەرپەرشتی کەمپەکە دەکات، بەگوێرەی هەردوو ئاماری ساڵی ڕابردووی ئیدارەی کەمپی هۆڵ و وەزارەتی کۆچ و کۆچبەرانی عێراق نزیکەی 43 هەزار چەکداری پێشوو و ژن و منداڵی ئەندامانی داعش لەو کەمپە کۆکراوەتەوە کە 18 هەزاریان عێراقین.

 

لێدوانی فەرمی: ئیڤان فایەق، وەزیری کۆچ و کۆچبەرانی عێراق ڕایگەیاند: 

- بڕیارەکەی ئەمەریکا بۆ ڕاگرتنی هاوکارییە دەرەکییەکان ڕاستەوخۆ کاریگەری لەسەر کەمپی هۆڵ لە باکووری ڕۆژهەڵاتی سووریا و بەرنامەکانی چاکسازی بۆ خێزانەکانی داعش دەبێت.

- لە کۆی 28 هەزار عێراقی نیشتەجێی کەمپی هۆڵ، تاوەکو ئێستا 11 هەزار کەسمان بۆ عێراق گەڕاندوەتەوە، لەنێویاندا نۆ هەزاریان جارێکی دیکە تێکەڵی کۆمەڵگا بوونەتەوە.

- حکومەتی عێراق نیگەرانییەکی زۆری هەیە لە هەوڵەکانی ئەحمەد شەرع سەرۆککۆماری سووریا بۆ قۆناغی ڕاگوزەر، بۆ هەڵوەشاندنەوەی کەمپی هۆڵ.