قاسم ئەعرەجی: لەگەڵ تورکیا کار دەکەین بۆ دوورخستنەوەی پەکەکە

 

ئاڤا نیوز

ڕاوێژکاری ئاسایشی نیشتیمانیی عێراق ئاشکرای کرد، لەگەڵ تورکیا کاردەکەن بۆ دوورخستنەوەی پارتی کرێکارانی کوردستان (پەکەکە) لە خاکی عێراق و ئاماژەی بۆ ئەوەش کرد کە تورکیا نایەوێت هیچ گرووپێکی چەکداری لەعێراق هەبێت.

وێنە گەورەکە: دوای ئەوەی لە ساڵی ڕابردوودا عێراق "پەکەکە"ـی وەکو ڕێکخراوێکی قەدەغەکراو لەعێراق ناساند، هەردوو حکومەتی عێراق و تورکیا لە هەوڵی ئەوەدان چەکدارانی "پەکەکە" لە سنووری نێوان هەردوو وڵات دووربخەنەوە و بەتایبەتیش دوای ئەوەی پرۆسەی ئاشتی لەنێوان ئەو پارتە و تورکیا لەو وڵاتەدا سەریهەڵداوەتەوە.

لێدوانی فەرمی: قاسم ئەعرەجی، ڕاوێژکاری ئاسایشی نیشتیمانیی عێراق لە چاوپێکەوتنێکی لەگەڵ کەناڵی "ئەلعەرەبیە" ڕایگەیاند:

•    هه‌وڵ ده‌ده‌ین چه‌كدارانی پارتی كرێكارانی كوردستان (په‌كه‌كه‌) له‌ عێراق دووربخەینەوە.
•   هیچ مەترسییەک لە سنووری سووریاوە لەسەر عێراق نییە، سوویاش دووپاتیکردووە کە ناهێڵێت هیچ گرووپێکی چەکداری بەرەو عێراق بێت و هەماهەنگی و هاوکاری لەنێوان هەردوولا لەمبارەیەوە هەیە، عێراق بەردەوامە لە هاوکارییە ئەمنییەکان.
•    هه‌موو لایه‌نه‌ عێراقییه‌كان هاوڕان کە چه‌ك ته‌نیا بە ده‌ستی ده‌وڵه‌ته‌وه‌ بێت.
•    ئەمریکا پێی ڕانەگەیاندووین کە هێزەکانی لە باکووری ڕۆژهەڵاتی سووریا دەکشێنێتەوە.
•    ئەمریکا ڕۆڵێکی گەورەی گێڕا لەڕێگریکردن لەوەی ئیسرائیل هێرش بکاتە سەر عێراق.
•   لە ڕێگەی کۆبوونەوە ڕاستەوخۆکانمان لەگەڵ بەرپرسانی ئەمریکا دەتوانین ئەو وێنە شێواوەی لە ئیدارەی نوێی ئەمریکا سەبارەت بە عێراق دروست بووە بگۆڕین.

زانیاریی زیاتر: لە 26ـی مانگی ڕابردوو، هاکان فیدان، وەزیری دەرەوەی تورکیا سەردانی عێراقی کرد، لەگەڵ سەرۆکوەزیران و وەزیری دەرەوەی عێراق و چەند بەرپرسێکی دیکە کۆبووەوە، لە کۆنگرەیەکی ڕۆژنامەوانیی هاوبەش لەگەڵ فوئاد حوسێن، هاوتا عێراقییەکەی ڕایگەیاند: پێویستە کاری هاوبەش بۆ بەرەنگاربوونەوەی پەکەکە بکەین، دوایین چاوەڕوانیشمان لە عێراق ئەوەیە بەفەرمی پەکەکە وەک "گرووپێکی تیرۆریستی" بناسێنێت.