بەهۆی بەفرو باران لە 20 پارێزگای توركیا دەرگای ناوەندەكانی خوێندن دادەخرێت

 

ئاڤا نیوز

بەهۆی بارینی ڕێژەیەکی زۆری بەفر و خراپی ڕێگاکانی هاتووچۆ، لە زۆربەی شارەکانی تورکیا دەرگای ناوەندەکانی خوێندن داخران.

چیرۆکی سەرەکی: شەپۆڵێكی سەرما و سۆڵە و بەفر و بارانبارین، وڵاتانی ڕۆژهەڵاتی ناوەڕاستی گرتووەتەوە، شەپۆڵەكە لە وڵاتی توركیا كاریگەرییەكەی زیاترە، بەهۆی خراپی ڕێگاكان و دروستبوونی ئاستەنگی هاتووچۆ، دەسەڵاتی كارگێڕی چوار پارێزگای باكووری كوردستان و 16 پارێزگای دیكەی توركیا، دەرگای ناوەندەكانی خوێندنیان داخست و كرایە پشوو.

زانیاریی زیاتر: بەهۆی كەڵەكەبوونی بەفر و شەختەی شەقامەكان و نزمبوونەوەی پلەكانی گەرما بۆ خوار سفری سەدی، هاتووچۆ لە شەقامەكانی بەشێكی زۆری ناوچەكانی باكووری كوردستان و توركیا پەكی كەوتووە، لە قوتابخانەكانی چوار پارێزگای باكووری كوردستانیش بەم هۆیەوە كرایە پشوو.

لێدوانی فەرمی: ئاژانسی هەواڵی ئەنادۆڵی توركی، لەزاری بەرپرسانی كارگێڕیی پارێزگاكانی سێواز، چەولیگ، ئەرزەڕۆم و ئەردەخان لە باكووری كوردستان بڵاویكردووەتەوە، سبەی شەممە 2025-02-08، بەهۆی كەڵەكەبوونی بەفر و دابەزینی پلەكانی گەرما بۆ خوار سفری سەدی، دەوامی قوتابخانەكان كرایە پشوو.