ئەمریکا 'دایکی هەموو بۆمبەکان' دەدات بە ئیسرائیل

ئاڤا نیوز

ئەمریکا بڕیاری داوە مووشەکی جۆری (GBU-43/B - MOAB)، کە لەبەر توانای زۆری لە وێرانکاریدا بە 'دایکی هەموو بۆمبەکان' ناسراوە، بداتە ئیسرائیل.

 

بڵاوکراوەی فەرمی: ستیڤن ویتکۆف، نێردەی سەرۆکی ئەمریکا بۆ ڕۆژهەڵاتی ناوەڕاست، ڕایگەیاندووە، واشنتۆن بڕیاری خۆی داوە و ئەم جۆرە بۆمبە دەدات بە ئیسرائیل.

 

زانیاریی زیاتر: ئەمە لە کاتێکدایە کە زیاتر لە دوو دەیەیە ئیسرائیل داوای ئەم مووشەکە دەکات، بەڵام تەواوی سەرۆکەکانی پێشووی ئەمریکا، لە ناویشیاندا خودی دۆناڵد ترەمپ لە خولی یەکەمی سەرۆکایەتییەکەیدا، لەبەر دوورکەوتنەوە لە گرژیی زیاتری ناوچەیی ئەم کارەیان نەکردبوو.

 

ئەوەی پێویستە بیزانیت: ئەم جۆرە مووشەکە درووستکراوی ئەمریکایە، یەکێکە لە بەهێزترین مووشەکە نائەتۆمییەکان، کێشی 11 تۆنە و توانای لەناوبردنی حەشارگە ژێرزەمینییە قووڵەکانی هەیە.

 

گۆشەیەکی دیکەی دیمەنەکە: توانا سەربازییەکانی ئیسرائیل بە هەبوونی ئەم مووشەکە زیاتر دەبێت و ئیسرائیل دەتوانێت دامەزراوە ئەتۆمییەکانی ئێران کە لە ژێر زەویدان بکاتە ئامانج. هەر بۆیە پێدانی ئەم مووشەکە بە ئێسرائیل بە ناردنی پەیامێک بۆ ئێران لێکدەدرێتەوە.