عێراق نیگەرانە لە جموجۆڵی داعش لە سنووری نێوان عێراق و سووریا

ئاڤا نیوز

 

جێگری سەرۆکوەزیران ئاشکرای دەکات، وڵاتەکەی نیگەرانە لە پەرەسەندنی جموجۆڵی چەکدارانی داعش لەسەر سنووری نێوان عێراق و سووریا.

 

وێنە گەورەکە: بوونی سنووری هاوبەش لەنێوان سووریا و عێراق، هاوکات چالاکی چەکدارانی داعش لە بیابانەکانی سووریا و بوونی هەزاران بەندکراوی ئەو ڕێکخراوە، حکومەتی عێراقی نیگەران کردووە و ڕیككاری ئەمنی توندی لەسەر سنوور گرتووەتەبەر. 

 

لێدوانی فەرمی: فوئاد حوسێن، جێگری سەرۆکوەزیران کە وەزیری دەرەوەی عێراقیشە لەمیانی چاوپێکەوتنێکی تەلەفزیۆنی لەگەڵ (Medi1 TV)  مەغریبی ڕایگەیاند:

 

-عێراق بەوردی دەڕوانێتە پێشهاتەکانی سووریا، چونکە کاریگەری لەسەر ناوچەکە درووست دەکات، هاوکات نیگەرانە لە جموجۆڵی چەکدارانی داعش لەسەر سنووری نێوان عێراق و سووریا، ئەمەش مەترسییەکی جددی ئەمنی دروست دەکات.

 

-سەبارەت بە دۆخی ناوچەکە، عێراق گفتوگۆکانی لەگەڵ تورکیا چڕکردووەتەوە و درێژەی پێدەدات، ئەمەش بە ئامانجی دروستبوونی سەقامگیری زیاتر.