ئەمڕۆ هاوپەیمانیی ئیدارەی دەوڵەت کۆدەبێتەوە

ئاڤا نیوز

لەسەر داوای سەرۆکوەزیرانی عێراق، هاوپەیمانیی ئیدارەی دەوڵەت کە هەموو لایەنە پێکهێنەرەکانی حکومەتی عێراق لەخۆدەگرێت، لە کۆشکی حکومی کۆدەبنەوە. دۆخی گشتیی وڵات و تاوتوێکردنی ژمارەیەک دۆسیە تەوەری سەرەکی کۆبوونەوەکە دەبێت.

 

وێنە گەورەکە: دوای بەریەككەوتنی هەر سێ دەسەڵاتی جێبەجێکردن، یاسادانان و دادوەری لە عێراق و قووڵبوونەوەی ناکۆیی نێوان لایەنە سیاسییەکان و هاوکات یەکلاکردنەوەی قەیرانەکان لەڕێگەی دەسەڵاتەکانی یاسادانان و پەکخستنی دانیشتنەکانی پەرلەمان، خەریکە عێراق بەرەو قەیرانێکی قووڵ و نادیار دەبەن.

 

ڕاگەیێنراوی فەرمی: بەگوێرەی ڕاگەیێنراوی نووسینگەی سەرۆکوەزیرانی عێراق، لەسەر داوای محەممەد شیاع سوودانی، داوای لە ئەندامانی هاوپەیمانی ئیدارەی دەوڵەت کردووە بۆ ئەوەی ڕۆژی شەممە 8ی شوباتی 2025 کۆببنەوە.

-هەر بەگوێرەی ڕاگەیێنراوەکە، ئامانج لە کۆبوونەوەکە تاوتوێکردنی دۆخی گشتیی وڵات و ژمارەیەک دۆسیەیە لەسەر ئاستی نیشتمانی.

 

ئەوەی پێویستە بیزانیت: هەفتەکانی ڕابردوو عێراق قۆناغێکی سەختی بەخۆیەوە بینی، ئەمەش دوای تێپەڕاندنی هەر سێ یاسای لێبوردنی گشتی، باری کەسی و گەڕانەوەی موڵک بۆ خاوەنە ڕەسەنەکانیان. لەلایەکی دیکەش ڕۆژی سێشەممەی ڕابردوو، دادگای فیدڕاڵی بە کاتیی و تا یەکلاییبوونەوەی ئەو سکاڵایانەی لەسەریان تۆمارکراوە، کارکردنی بە یاساکان ڕاگرت.

 

ئەمەش بزانە: ئەو بڕیارەی دادگای فیدراڵی کاردانەوەی بەدوای خۆیدا هێنا، بەتایبەتی لەلایەنی پێكهاتەی سوننە کە داوای جێبەجێکردنی یاسای لێبوردنی گشتی دەکەن کە دەبێتە هۆی ئازادکردنی دەیان هەزار هاووڵاتی کە سەر بەو پێکهاتەیەن.

 

• لە بەرامبەردا ئەنجوومەنی باڵای دادوەریی لە ڕێنماییەکدا بڕیارەکەی دادگەی فیدراڵی بە نادەستووری دانا و دوای ئەوەش دەسەڵاتەکانی دادوەریی لە پارێزگاکانی عێراق پاڵپشت بە بڕیارەکەی ئەنجوومەنی باڵای دادوەری و گوێنەدان بە بڕیارەکەی دادگەی فیدراڵی، دەستیان بە جێبەجێکردنی ڕێکارەکانی لێبووردنی گشتی کرد.

 

لەلایەکی دیکە: بۆ کۆتاییهێنان بەو ناکۆکییە سیاسیانەی کە لەم دواییانەدا سەریان هەڵداوە، ڕۆژی 5ی شوبات مەحموود مەشهەدانی، سەرۆکی ئەنجوومەنی نوێنەرانی عێراق داوای کۆبوونەوەیەکی فراوان و بەپەلەی لە هێزە سیاسییەکان و سەرجەم ئەندامانی هاوپەیمانی ئیدارەی دەوڵەت کرد.

 

بە تەنیشت ئەو بابەتەوە: بەرەی نوێنەرانی ناوەڕاست و باشوور ڕۆژی هەینی ڕاگەیەندراوێکی سەبارەت بە کۆبوونەوەی هاوپەیمانی ئیدارەی دەوڵەت بڵاوکردەوە، لە چوارچێوەی پێنج خاڵ چەند داواکارییەکیان خستووەتەڕوو، گرنگترینیان "گێڕانەوەی ژیان بۆ ئەنجوومەنی نوێنەران و ئەو ڕۆڵە دەستوورییەی کە دەیگێڕێت وەک بەرزترین دەسەڵاتی یاسادانان" و "دەنگدان لەسەر پڕۆژە یاسای حەشدی شەعبی و خانەنشینی".