ڕۆژئاوای کوردستان دژی بڕیارێکی ئەمریکا دێتە دەنگ

ئاڤا نیوز

ئیدارەی خۆبەڕێوەبەری ڕۆژئاوای کوردستان دەڵێت، بڕیاری ڕاگرتنی هاوکارییە دەرەکییەکانی ئەمریکا بۆ ماوەی 90 رۆژ، زیان بە کەرتی خزمەتگوزاریی، پەروەردەیی و تەندروستی دەگەیێنێت و کێشەکانی کەمپی ئاوارەکانیش لە ناوچەکانیان زیاتر دەکات.

چیرۆکی سەرەکی: لەدوای دەستبەکاربوونی دۆناڵد ترەمپ سەرۆکی ئەمریکا لە 20ـی مانگی ڕابردوو، ئیدارەی ئەمریکا بڕیاریدا هاوکارییە دەرەکییەکان لەڕێگەی ئاژانسی ویلایەتە یەکگرتووەکانی ئەمریکا بۆ پەرەپێدانی نێودەوڵەتی بۆ ماوەی 90 ڕۆژ ڕابگرێت، تا بزانرێت ئەو هاوکارییانە تا چەند لەگەڵ سیاسەتی دەرەوەیاندا دەگونجێن.

لێدوانی فەرمی: ناجی حەبۆ، هاوسەرۆکی فەرمانگەی ڕێکخراوەکان لە ئیدارەی خۆبەڕێوەبەری ڕۆژئاوای کوردستان لە لێدوانێکدا ڕایگەیاند، بڕیارەکە کاریگەری ڕاستەوخۆی لەسەر ئاوارە و کەمپەکان دەبێت، چونکە ناوچەکانیان بەدۆخێکی سەختدا تێدەپەڕن و هیچ دەروازەیەکی جێگرەوەی نێودەوڵەتیشیان بۆ هاوکارییەکان نییە، ئەو ڕێکخراوە ئەوروپییانەشی ئێستا هەن تەنیا 25%ـی هاوکارییەکان دابین دەکەن.

بەشێکی دیکە لە قسەکانی هاوسەرۆکی فەرمانگەی ڕێکخراوەکان:

- بڕیارەکە کاریگەری لەسەر کەرتەکانی تەندروستی، وزە، کشتووکاڵ، منداڵان، ژینگە، ئاوی خواردنەوە، خاوەن پێداویستییە تایبەتییەکان، ئابووری ناوخۆیی، ڕاهێنانەوەی دەروونی بەگشتی و بەتایبەت لە کەمپەکان دەبێت.

- 50 هەزار ئاوارە لە کەمپەکانی ڕۆژئاوای کوردستان هەن، 23%ـی ئەو ئاوارانەش لەخوار تەمەنی پێنج ساڵییەوەن.

- کەمی خۆراک و چاودێری تەندروستیی کە بەهۆی بڕیاری ڕاگرتنی هاوکارییەکان دروستدەبێت، کاریگەری لەسەر لانیکەم 20 هەزار ژن و منداڵ دروستدەکات.